Second Division Playoff: Vawiinah Chanmari West Vs Armed Veng

Aizawl DFA buatsaih Second Division khel tur zawnna chu Lammualah khelh chhunzawm zel a ni. Vawiin hian group B aṭanga second round lut tur a hriat dawn a, chawhma dar 9:00-ah Chanmari West FC leh Armed Veng FC te an inkhel ang.

West Warrior hi Police defender hlui Lalrinchhana'n (Itana) a enkawl a, veteran player H. Lalnunzira (Zirtea) ten an la ho peih bawk. Chanmari West tan second round lut turin chak ngei ngei a ngai a, Armed Veng ta erawh 'draw' a tawk.

Armed Veng hian India junior captain hlui Eric Lalsangzuala an kawl a, team captain Lalrintluanga pawh India junior tan a inlan tawh bawk. Second round lut turin Armed Veng dinhmun a ṭha hret.

Nimin khan Reuben FC chuan an elpui Muantea Memorial FC chu 5-2 in an hneh a, group A aṭangin second round an lut.