Europe-a football inelna sang ber Champions League

UEFA Champions League chu September 19 aṭangin khelh ṭan a ni dawn a, chutihrualin a khel tur zawnna preliminary round erawh khelh ṭan a ni tawh. UCL khel tur team 32 aṭangin team 26 a chiang tawh a, qualifier aṭangin team paruk an tling leh dawn.

Draw kalphung

UCL group stage draw hi August 31 hian neih a ni dawn a, pot awm dan tur pawh a hriat theih ṭan. Pot 1-ah champion lai Manchester City, Europa League champion Sevilla bakah Spanish champion Barcelona, Italian champion Napoli, German champion Bayern Munich, French champion Paris Saint-Germain, Portuguese champion Benfica leh Dutch champion Feyenoord te an awm.

Pot khata mi hi group khatah a awm thei lo a, team pariat hi group hrang pariatah an awm ang. Pot 2-ah UCL-a champion tawh team nga Real Madrid, Manchester United, Inter Milan, Borussia Dortmund leh FC Porto bakah UEFA coefficient-a ranking-a che ṭha Atletico Madrid, RB Leipzig leh Arsenal te an awm.

Pot 3 leh Pot 4 pawh hi UEFA coefficient ranking-a rem a ni a; Pot 3-ah Shakhtar Donetsk, Salzburg, AC Milan, Lazio leh Red Star Belgrade te an awm. Hmun ruak pathum hi qualifying hmanga hnawh khah tur an ni.

German club Union Berlin leh French club Lens te UCL khel turin tling nghal mah se inelnaah tawnhriat an neih ṭhat loh avangin Pot 4-ah an awm. Hmun ruak dang paruk hi qualifying hmanga zawn tur a ni.

Group khatah hian pot tin aṭangin pakhat ṭheuh an awm dawn a, chutihrualin ram khat club hi group khatah an awm thei lo. Chumi awmzia chu Napoli, Inter Milan leh AC Milan/Lazio te hi pot hran ṭheuhah awm mah se Italian club vek an nih avangin group khatah an awm thei lo a, group hran vekah an awm ang.

Liverpool an vanduai?

UCL hi 2024-25 season aṭang chuan team 32 ni loin team 36 a ni tawh dawn a, hmun ruak pali hi season hnuhnung bera ram che ṭhaten an insem ang. Kalphung thar hi 2024-25 season ni loin 2023-24 season-a hman tur chu ni se English leh Italian club te an chet ṭhat avangin Liverpool leh Atalanta te hi UCL khel thei tur an ni.

Mahse, tun season-ah erawh team 32 thoin an la khelh dawn avangin Liverpool an vanduai - Europa League an khelh rih a ṭul phah. 2024-25 season aṭang chuan group stage-ah match ruk khel loin match riat an khel dawn a, an khingpui hi a hrang vek an ni ang.

Team 36 chu group hranah an awm dawn tawh lo a, league table pakhat vek an ring dawn. Tuna mi ang tho hian chak chuan point ruk a ni ang a, in draw chuan point khat, chak loh chuan point hmuh loh a ni dawn.

League table-a sang pariat chuan knockout stage an lut nghal ang a, pakuana aṭanga 24-na te erawhin quarterfinal lut turin last 16 an khel ang. Last 16 hi double legged playoff-a khelh tur a ni.