Tottenham an bazar zel James Maddison an la

Premier League club Tottenham Hotspur pawh an inthuam belh zel a, Championship lama tla hlim Leicester City aṭangin midfielder James Maddison chu pound maktaduai 40-in an lalut - kum nga chhung atan contract an ziahpui.

Spurs hian Celtic aṭangin coach thar Ange Postecoglou an lalut a, Australian coach hoin an inthuam ṭha mek - Maddison hma hian goalkeeper Guglielmo Vicario chu Empoli aṭangin an lalut tawh a, Juventus aṭanga loan-a an hawh Dejan Kulusevski chu a nghetin an lalut bawk.

London club hian player langsar zingah Lucas Moura chu an chhuahtir tawh a, Harry Winks chuan Leicester City a zawm hnai bawk - he thuziak i chhiar meuh chuan an inlalut fel tawh hial mai thei.

Hetihlaia Spurs rilru kaptu ber erawh Harry Kane a ni lo thei lo - Bayern Munich chuan an striker chhuanvawr hi chhuhsak tumin an dawr mek a, Kane hian chhuah a duh miau avangin London club tan chelh luih a harsa ang.

Hei le Maddison

Kum 26 mi Maddison hi season hmasa ṭan dawn thleng kha chuan European football-a club liante chil tiputtu a tling pha a, mahse, Foxes a relegate pui hnuah a hlu lo sawt em ni chu aw, tih turin transfer-ah thawm a nei lo a, tunah Spurs-in an chang ta.

Maddison hian June 2018 khan Norwich City aṭangin Foxes chu £20mtd-in a zawm a, season nga chhungin match 203-ah goal 55 khungin, assist vawi 41 a nei a, FA Cup leh FA Community Shield-ah te nomawi a chawipui bawk.

Season hman zawh takah khan inelna hrang hrangah match 32 khelin goal 10 a khung a, assist vawi kua a nei tel bawk - Spurs hian Christian Eriksen an chân hnuah top class playmaker tia chhal theih an la nei leh lo a, Maddison an lalut thei hi lawm tur an ni.

England tana vawi thum inlan tawh Maddison hi ball pet thiam bik, a khelh ṭhat ni chuan inkhel sawi danglam thei khawpa player theihna nei sang a ni a, Foxes fan-ten an ui khawp ang.

Mahse maw

Spurs fan-te Maddison an lakluh theih avangin an lawm a, hetihruala rilru kap lo thei lo pakhat chu Kane chungchang hi a ni - Bayern Munich-in an dawrna hmasa chu pawm a nih loh hnuah German club hian man tam zawkin Spurs an dawr leh dawn.

Khawthlang media-ten an tarlan dan chuan Bayern hian £70mtd-in Spurs hi an dawr zet a, mahse, hei aia tam zawk hian an dawr leh dawn niin khawthlang media-te chuan an tarlang.

Manchester City chuan kum 2021 nipui lai khan Kane hi na takin an lo rim tawh a, mahse, London club-in chhuah an phal loh miau avangin Kane a chhuak thei lo - Spurs chairman Daniel Levy hian a striker hi up beh a inthlahrung lo.

Chutihrual chuan Kane hi kum 29 mi a ni tawh a, tun thlengin nomawi a la chawi lo a, nomawi chawi a châk tawh - Bundesliga thununtu Bayern zawm hi a tan chuan nomawi chawina awlsam ber a ni thei hial ang.

Harry aiah Harry

Spurs-in Harry Kane an chelh duh viau laiin Harry dang erawh an chhuahtir dawn a, midfielder Harry Winks chuan £10mtd-in Championship club Leicester City a zawm dawn - he thuziak i chhiar meuh chuan a zawm fel tawh hial mai thei.

Tottenham academy aṭanga inzir chhuak Winks hi England tana vawi 10 inlan thei a ni a, mahse, kum 2020 hnu lamah a inlan leh tawh lo - season hmasa kha Sampdoria-ah loan-in hun a hmang a, league match 20 khel mah se Serie A aṭangin an tla.

Spurs tan match 203 khel hmanin, goal nga a khungsak a, assist vawi ruk a nei bawk - a career-ah nomawi chawi a la nei lo a, mahse, a season hman ṭhat bera chhal ngam season-ah Spurs-in Champions League final an thleng.

Winks hian 2016-17 season-ah khan Spurs tan a hming rawn chherin, match 33 a khelhsak nghal a, 2018–19 leh 2019-20 season kha season khata match a khelh tam ber niin, match 41 ve ve a khel - kum 27 mi a ni tawh a, a tirah beiseiawm viau mah se beisei a phak zui ta chiah lo a ni.

Leicester thawnthu

Premier League champion hial niin khawvel an barakhaih a, kum 2021-ah FA Cup-ah an champion bawk - mahse, season tharah chuan Championship an khel dawn a, English top flight league khelh leh a harsa dawn.

Hetihlai hian player langsarten an chhuahsan zel bawk - Belgian midfielder ṭha Youri Tielemans chuan free transfer-in Aston Villa a pan tawh a, tunah James Maddison a chhuak leh ta.

Mahse, hetiang boruak karah Winks hming a ri a, Championship-a player langsar ni phak tur khawp chu a la ni. Hetihlai hian Ayoze Perez, Caglar Soyuncu, Daniel Amartey, Nampalys Mendy leh Ryan Bertrand te chuan an contract hmang zoin Foxes an chhuahsan tawh bawk.

Leicester hian coach thar atan Manchester City assistant coach Enzo Maresca an lalut tawh a, Premier League kir leh ngei an tum dawn.