Vawiinah cycling inelna XC0 2023

Mizoram Cycling Association (MiCA) chuan vawiin dar 10:00 hian Muthi ramah Mizoram XCO 2023 a buatsaih dawn. Inelna chhim tur hian Cycling Federation of India joint secretary Dr Tapan Das leh Cycling Association of Assam joint secretary Dibyaiyoti Rajkhowa ten Aizawl an rawn thleng tawh a, nimin khan Mutthi ram hi an tlawh.

MiCA-in XCO race a vawi khat buatsaihna tur a ni a, kawng bumboh leh chhuk chho tak takah intlansiakna hi neih a ni ang. Inelnaah hian cyclist 40 an tel dawn. Inelna kalphung hi Cross-Country Olympic (XCO)a ni dawn a, category pathum Junior, Master leh Elite-ah ṭhen a ni.

Junior-ah hian kum 17 chin an tel thei a, Master hi kum 35 chunglam tan niin Elite hi a duh apiang tan a ni thung. Cyclist tel turte hi category pakhatah chauh a tel theih a ni.

XCO race buatsaih a nih theih nan hian SBCC, UD&PA, MZU Incubation Centre, Amawii Hero, TLC Food & Catering, JS Hub (Mission Veng), Varte Cycles (Chaltlang) leh Lalniliana Fitness Store (Mission Veng) ten an sponsor. Media partner chu Zonet a ni a, graphic partner chu Mizoram Academy of arts niin Photographic partner chu Mizoram School of Photography a ni thung.