Ni 10 chhung atan Mourinho an hrem!

Jose Mourinho leh hrem tih hi thil inhmeh niin i hre ve em? Season chawlh lai ni mah se an hrem leh tawh - season thar ṭan hun ni 10 chhung chu Portuguese coach hi hrem a ni a, pawisa chawitir a ni bawk.

May 4 khan Mourinho enkawl AS Roma leh Monza te inkhelin, 1-1 in an inhnehtawk a, Roma player Mehmet Zeki Celik chu hun pek belhah hnawhchhuah a ni bawk. Referee thutluknaah Mourinho a lungawi lo fal a, ṭawngkam a insum lo.

Mourinho chuan, "Referee ka tawn tawh zawng zawngah a la chhe ber," tiin he inkhel enkawltu Daniele Chiffi chungchang a sawi a, Italian FA chuan Portuguese coach hi ni 10 chhung khelmuala a team ho thei lo turin an hrem ta a ni.

Kum 60 mi manager hian season thar Serie A an match hmasa berah a naute a ho thei dawn lo chiang tihna a ni a, euro 50,000 (Rs. 44,78,873) an chawitir bawk.

Mourinho hian, "Mi mawl ka ni hleinem. Dressing room ka chhuahsan aṭanga ka luh thlengin ka thusawi zawng zawng kha ka record sa vek," tiin a inven ṭhat thu a lo sawi tawh a, mahse, hrem a ni ta tho a ni.

Monza nen an inkhelh ṭuma yellow card hmutu Mourinho hian season hman zawh takah khan buaina a tawk hnem hle. Official nen an intihbuai avangin ṭum thum ngawt red card a hmu a, heng zingah hian tuna an hrem chhan referee Chiffi-a'n Atalanta laka an tlawm ṭuma a pek chu a tel.

Mourinho hian season hman zawh takah khan AS Roma hi table-ah parukna a nihpui a, Europa League final luhpui mah se final-ah Sevilla chu penalty hmangin an ngam lo - season tharah Champions League an khel dawn lo tihna a ni nghal.

Serie A season thar hi August 19-20 a ṭan tura beisei a ni.