Chelsea keeper Mendy a chhuak ve leh ta

Saudi Arabia-in European football a rûn chhunzawm zel - Chelsea goalkeeper Edouard Mendy chuan Saudi Pro League club Al-Ahli a zawm ve leh ta a, tun nipui transfer-a Blues player zinga Saudi pan pathumna a ni.

Kum 31 mi Mendy hma hian Chelsea tana a khelhpui ṭhin Kalidou Koulibaly leh N'Golo Kante te pawhin Saudi Pro League lam hi an lo pan tawh a, Hakim Ziyech pawh Al Nassr nen sawizawm mek a ni - he thuziak i chhiar meuh chuan an inrem fel tawh hial mai thei.

Édouard Mendy hian kum 2020 khan French club Rennes aṭangin Chelsea hi a zawm a, match 105 khelhsak hmanin, vawi 49 cleansheet a nei. Kum 2021 khan Champions League nomawi a chawipui a, UEFA goalkeeper of the season-a thlan a nih bakah Best FIFA Men's keeper-ah thlan a ni bawk.

Mendy hian 2018-19 season aṭang khan top flight league a khel ve chauh a, hei vang hian Chelsea-a hming a rawn chher hian fak a hlawh nasa hle. Club tan a hlawhtlin piah lamah an ram Senegal chu Africa Cup of Nations 2021-ah a champion pui a, final-a Egypt an hneh nan penalty shootout-ah a che ṭha hle.

Mahse, Blues-ah amah duhsaktu coach Thomas Tuchel ban a ni a, September 2022 aṭang khan Graham Potter-a'n team enkawl ṭanin, Chelsea a zawm tirha a nekchhuah Kepa Arrizabalaga chuan nek chhuak ve lehin, second keeper angin season a hmang tluan.

Mendy hian season hman zawh takah khan inelna hrang hrangah match 12 chiah a khel. Chelsea chuan an goalkeeper thlahna thu hi club website lamah tarlangin, "French football division hniam lama bul ṭanin, club nei loa hun hman chang pawh a nei hial.

"Mahse, chutiang hun thim ata chu Chelsea tan European football-a hun ropui a tawng thei a ni. Khelmual chhung leh pawnah pawh ngainatawm tak a ni a, Champions League 2021 nomawi kan chawi nana a tha thawh avangin he club hian kan hre reng tawh ang.

"A sulhnu leh hnathawh zawng zawng avangin kan lawm a, Edou, duhsakna kan hlan che," tiin an keeper hi an thlah a, kum 2021 lawka khawvela keeper ṭha bera thlan hian season tharah chuan Saudi-ah football a khel dawn!

Al Ahli hian Mendy man atana an sen zat tarlan ni chiah lo mah se, pound maktaduai 16 an theh chhuak nia sawi a ni a, kum thum atan contract a ziak niin an sawi bawk.

Blues-a £2.7mtd vel kum khata hlawh anga sawi keeper hian Al Ahli-ah hian kum khatah £12mtd a hlawh dawn niin an sawi a, a khelh ṭhat dan a zirin £3mtd a hlawh belh thei bawk ang.

Al Ahli chuan, "Senegal sa huai chuan kan goal min vensak dawn e," an ti a, "Khawvela goalkeeper ṭha ber chu kan ta a ni ta," an ti bawk - an phur hle.

Mendy-a'n Blues tana a khelhpui ṭhin Koulibaly leh Wolverhampton Wanderers midfielder hlui Ruben Neves te chuan tun hnai khan Al-Hilal an zawm a, Kante-a'n Saudi league champion Al-Ittihad panin, Real Madrid striker Karim Benzema nen an khel dun dawn a ni.