A hmasa berah Alcaraz

Tennis inelna lian leh ngaihhlut Wimbledon a hnai ta. Nilaini zan khan tournament buatsaihtu lam chuan seeded list an tar chhuak a, mipa singles chung berah Carlos Alcaraz a awm.

Player ropui pali - Roger Federer, Rafael Nadal, Novak Djokovic leh Andy Murray ten hun rei tak chhung tennis an thunun, anni ho tih lohah chuan Alcaraz hi 2003 hnu lama Wimbledon seeded pakhatna ni thei hmasa ber a ni hial.

Spanish tlangval Alcaraz hi tun dinhmunah world number 1 a ni a, hei vang hian seeded pakhatna a ni hi a mak lo, chutihrualin Wimbledon hi chuan ranking sang ber hi seeding chung berah an dah ziah kher lo a ni.

Kum 20 mi Alcaraz hnungah hian Novak Djokovic a awm dawn, Serbian star hian French Open nomawi a chawi hnuah tournament a khel leh lo, grass court atan inbuatsaihna nei mumal loin Wimbledon a khel dawn.

Grand Slam vawi 23 champion tawh Djokovic tan grass court inelna lian hi thil thar a ni dawn lo a, vawi sarih ngawt a champion tawhna hmun a nih avangin a mikhual dawn chuang lo - champion tura rinkai ber a la ni tho ang.

Alcaraz leh Djokovic te hnungah hian Daniil Medvedev, Casper Ruud, Stefanos Tsitsipas, Holger Rune, Andrey Rublev leh Jannik Sinner te an intlar a, tunlai player ṭha ber berte an inlan dawn avangin Wimbledon a hmuhnawm leh dawn hle.

Wimbledon hi tun kar aṭangin qualifier an khel ṭan tawh. July 3, Thawhṭanni aṭangin main draw an khel dawn a, grand slam dangte ang bawkin All England Club-a inelna neih hian chawlhkar hnih chhung a awh ang.