Arsenal player thar Kai Havertz

Kai Havertz chuan Arsenal tan kum nga daih contract a ziak fel a, pound maktaduai 65 man a ni. Germany international hian North London club tan 2028 thleng cham turin thu a tiam tihna ni.

Kum 24 mi Havertz hian Chelsea chhuahsanin Arsenal a zawm avangin London khawpuiah chuan a la cheng chhunzawm dawn. Emirates Stadium a pan chhan chu Gunners chet dan chu chhungkua anga ṭangrual nia a hmuh vang a ni tih a sawi chhuak.

Bayer Leverkusen aṭanga inzir chhuak a ni a, a zir chhuahna tan hian match 150 aṭangin goal 46 a khung bakah assist vawi 31 a nei. Kum 2020 nipui lai khan Chelsea a zawm - Blues tan inelna hrang hrangah match 139 aṭangin goal 32 leh assist ṭum 15 a nei hman.

Arsenal a pan

Season hmasa khan Chelsea an che ṭha lo, team talbuai tan hian goal kua chu a khungsak tho - Blues tana a sulhnu hnutchhiah zingah chuan 2021 Champions League final-a Manchester City an hnehna goal awmchhun kha a tel ngei ang.

Neitu thar Todd Boehly an nei a, coach thar Mauricio Pochettino an nei bawk - Chelsea player chhuak an tam, an zingah chuan Havertz a tel, an ṭhenawm club Arsenal chuan remchangah lain an lo lei hmak.

Mikel Arteta-a'n season ruk hnuah Arsenal chu UCL khel turin a tlinpui a, hei vang hian player ṭhain an hnena kal an hreh lo. European football inelna sang ber an khelh turah Havertz-a tawnhriat hi a pawimawh thei dawn.

Chhungkua

Football team chu mimala siamṭhat vek theih a ni lo a, hlawhtling emaw thleng sang emaw tur chuan lungrual leh phur taka thawhho a ngai - Havertz chuan Arsenal hi chhungkaw lungrual leh inngeihtak nia a hmuh avangin a pan.

Havertz chuan, "Khelmual chhungah chhungkaw inngeih leh lungrual tak angin an khel a, an rilru puthmang dik hi Arsenal ka zawm chhan zinga mi a ni. Player ṭha leh theihna sang tak tak an tam, chuvangin hlawhtlinna lian kan chan theih ka beisei.

"Season tharah Chanpions League kan khel dawn, he inelna khelh hi player zawng zawng duhthusam a ni. Tawnhriat ka lo nei ve tawh a, nomawi hlu bik tak mai chuh leh thei tura hun ṭha ka nei thei tur hi ka lawm," tiin a sawi.

Beisei an nei

Mikel Arteta-a'n team nghet tak a din chho mek a, club neitu Stan Kroenke te chhungkua pawhin Spanish manager chungah rinna an nghat. Season hmasa lama Premier League champion 'teuh' an nihna chu a taka chantir an duh tih a lang - bazarah sum an hmang huai.

Arteta chuan, "Kai leh a chhungte chu Arsenal Football Club-ah kan lo lawm a che u. Ani hi player theihna nei sang leh fing tak a ni a, kan midfield chu nasa takin a rawn thuam chak ngei ang. Pre season aṭangin ṭha taka kan thawhho ka beisei," a ti.

Gunners sporting director Edu pawhin an player thar lawmna sawiin, "Kai-a kan nei fel thei hi kan lawm, kan club chhungkua chuan ani neih fel hlan hi kan nghakhlel hle a ni. Ball sem leh a khung lamah nasa taka min tichak theitu tur a ni," tiin a sawi a, an player thak lakah an beisei a sang.

Rice a hnai bawk

Arsenal hian champion thei squad din ngei an tum, West Ham United nen Declan Rice manah an inrem tawh bawk. England international midfielder hi pound maktaduai 105 man a ni ang.

Gunners lei dilna hmasa chu Hmmers lamin an lo hnawlsak - West Ham lamin Manchester City dawrna an ngaichang bawk. Mahse, pound maktaduai 90 a an dawrna bak chu Citizens an che zui ta lo; pawisa hmang ngam zawk Arteta hote an dingchang.

Havertz bakah Rice a chiang tluk a ni tawh a, tlarhnung thuam chak nan Ajax defender Jurrien Timber lak tumin an bei mek bawk. Netherlands international hi euro maktaduai 48 bawrin an dawr tawh a, inbiakna an nei mek a ni.