‘Tata’ Martino leh Messi thawk dun leh dawn

Major League Soccer club Inter Miami-in Lionel Messi an chân meuh chuan Argentina legend duh lam hawi zawngin thutlukna an siam zel a, coach thar atan Barcelona boss hlui Gerardo 'Tata' Martino an lalut.

Inter Miami hian June thla khan Manchester United defender hlui Phil Neville chu an coach aṭangin an bân a, coach thar an neih loh reng hnuah Martino an lakluh thu hi an puang ta a ni.

Martino hian World Cup 2022-ah khan Mexico a kaihruai a, mahse, group stage aṭanga an tlak hnuah chhuahsanin, hemi hnu hian team enkawl a nei leh tawh lo - Inter Miami an lo lang a, an sawmna a pawm ta a ni.

Inter Miami neitu zinga mi David Beckham chuan, "Tata hi he infiamnaah hian zah a hlawh êm êm a, a sulhnute hian eng ang taka coach ṭha nge a nih chu min hrilhfiah vek a ni.

"Coach a nihna anga a tawnhriat leh a hlawhtlinna te hian kan team pawh a tiphurin, fan-te pawh a tilawm hle ang tih kan ring tlat a, khelmual chhung leh pawna a hnathawh rahchhuahte hmuh kan châk tawh hle a ni," a ti.

Martino hian Miami zawm dawn chiang tawh mah se contract erawh a la ziak fel lo nia sawi a ni a, Miami club chuan lehkha pawimawh tihfel ngaite an tihfel hnuah Tata Martino chuan team enkawl hna a thawh ṭan nghal tur thu an sawi.

Inter Miami managing owner Jorge Mas chuan, "Inter Miami-a Tata kan lalut thei hi kan lawm takzet. Club kan nihna anga kan hmachhawpte tihlawhtling thei tura kan ngaih a ni a, ani ho hian hlawhtlinna ropui tak kan chhar thei ang, tih ka ring tlat.

"Tata hian level sang ber thlengin team a lo enkawl tawh a, he hmuna kan tum ber chu nomawi chawi a nih avangin a tawnhriatte hian nasa taka min puih theih kan beisei a ni," a ti.

Kum 60 mi Gerardo Martino hi football khawvelah a mikhual lo hle. Messi ringawt pawh Barcelona-a a enkawl tawh bakah Argentina team-ah a enkawl tawh a, thilmak ve tak erawh nomawi lian tham chawi dun an la nei miah lo!

Barcelona-ah season khat chiah châmin Spanish Super Cup a chawipui a, mahse, La Liga leh Copa del Rey-ah pahnihna a nihpui a, Champions League quarterfinal aṭangin an tla bawk.

Argentina team nen pawh Copa America final vawi hnih lut mah se a chak lo zawkah an ṭang ve ve a, Inter Miami-ah Messi leh Martino te hian an thawnthu duhawm lo hi thaibo an duh ang.

Gerardo Martino hi US-ah a mikhual lo - Atlanta United FC chu September 2016 aṭanga December 2018 thleng kha a lo enkawl tawh a, Major League Soccer Cup-ah champion nomawi kum 2018 khan a chawipui a ni.

Inter Miami hi MLS Eastern Conference table-ah a mawngphah luahtu an ni mek a, league match 18 khelh tawhah vawi 13 ngawt an tlawm tawh - Martino hna a awlsam dawn lo.

Miami hian Barcelona-a Messi khelhpui ṭhin tho Sergio Busquets an lo lalut tawh bawk a, US-a mipui ngaihven ber club an ni zui a nih pawhin a mak lo ang.