Zaninah Pro Volleyball League Final : Thutak Nunpuitu Team hmaah Hunthar

Tualchhung volleyball inelna lian ber - Tata SK 712 Pro Volleyball League chu zaninah a hmawr bawk a ni dawn ta. Thutak Nunpuitu Team (TNT) leh Hunthar ten a thiam ber nih an inchuh dawn a, inkhel a hmuhnawm ngei ngei dawn.

Final hi R. Dengṭhuama Indoor Stadium-ah khelh tur niin, zan dar 8:00-ah inkhel an ṭan ang. A hmunah mi zawng zawng an leng lo, ṭantu nei ṭha team pahnih an nih avangin stadium chu a khat hma dawn, ṭhutna ṭha chang tur tan kal hma a finthlak ang.

Nizan khan hmeichhe inelna lamah Luangmual leh Kanan ten final an khel a, inkhel result kan hre hman lo. Pro Volleyball League hi LPS lamah en theih a ni a; YouTube lamah en theih a ni bawk.

Mizo hlang TNT

Volleyball leh Thutak Nunpuitu Team (TNT) hi an inzawm tlat a, tualchhung volleyball chawisangtu leh meichher chhinungtu pawimawh zinga mi an ni. TNT hian PVL hi a tir aṭangin an la khel ngar ngar a, nomawi erawh an la chawi ngai lo.

PVL season hmasa ber leh nikumah khan final an lut a, mahse Anastasia Electric Veng leh Durtlang North hneh loin a vanduai zawkah an ṭang - kuminah a vawi thum nan final an khel dawn; Mizo player hlanga champion ngei an tum ruh hle.

TNT assistant coach Lalzawmliana chuan, "State pawn aṭanga player chah luhte hi thil châkawm tak a nihna chen pawh a awm, mahse a senso a hautak bakah kan tan a rem chiah lo, chuvangin tualchhung player kan neih sate hi kan ringtawk a ni," tiin Vanglaini a hrilh.

Season hmasa lama player an rin ngaite bawk TNT hian an ring nawn a, nikum aiin an player an puitling tawh. Coach Lalhmangaihsanga Sailo-in a naute a remkhawm fuh ṭhin - Hunthar lakah pawh chak an tum ruh dawn, chutihrualin chesual ve thei tho an ni bawk.

Vanlalṭanchhana (Valbuanga) hming a langsar ṭhin, match vawi ruk a khelh tawha vawi nga ngawt Man of the Match ni thei a nih avangin a mak lo. Chutihrualin TNT ṭhatna ber erawh team pumpui thawhhona a ni, zaninah pawh a pawimawh leh ang.

TNT hian ṭantu an nei ṭha ṭhin a, an hmunpui aṭangin mi 200 bawr vel an kal thei ṭhin - motor an neih dana zirin kal thei zan hi a la pun belh theih bawk. Muanna Venga awm kher lo ṭantu an ngah, zaninah pawh thawm bengchheng leh boruak lian an ni leh dawn.

Zam ngai lo Hunthar

Hunthar hi volleyball thiam veng an ni a, an tuichilh bawk. Club anga an kal chinah pawh hlawhtlinna an chang hnem ta malh malh hle. PVL bikah pawh hian 2017 leh 2018 khan an champion thei, season hmasa khan semifinal an thleng bawk.

PVL 2023-ah pawh team hmuhnawm leh hlauhawm berte zinga mi an ni a, league round-ah TNT hi 3-1 in an ngam loh bak chu chetsual an nei lo, vawi li chakin semifinal-ah team ṭha Chhinga Veng Spikers chu 3-0 (25-23, 25-20, 25-21) in an hneh.

Spikers nen an inkhelh hmain Hunthar coach VL Malsawma Renthlei chuan Chhinga Veng ṭhatzia Vanglaini a hrilh a, mahse tun PVL an khelh china set an hloh lohna hmasa ber an thlentir thei - theihna an nei tih a chiang.

Sawma chuan, "Tun PVL bikah chuan TNT hi team ṭha fal nalh an ni a, keini chuan an chetsual kan chân a ngai dawn. An dai sual zeuh a nih erawh chuan na takin kan vaw let ang," tiin Vanglaini a hrilh, an champion hmasa pahnihah assistant coach a nih tawh avangin tawnhriat a nei ṭha.

Hunthar hian Gagandeep Singh an nei a, ani bakah hian tawnhriat nei ṭha Laldensanga, Zomuansanga, Lalnunfela, Lalramnunfela leh setter fing tak Remsangzuala te an nei bawk - TNT tan zuamsual theih tur tak an ni ang.

Volleyball ngaina veng an ni bawk - zaninah pawh an thawm a na leh dawn. Local Council (LC) lamin mipui kalna tur an ngaihtuahsak ṭhin a, coach Sawma chuan zaninah chuan an veng chhunga litthei zawng zawng an chet chhuah vek mai a rin thu a sawi hial a ni.