Sum aia hming ṭhat thlangtu Son Heung-min

Tottenham Hotspur forward Son Heung-min chuan Saudi Arabia aṭangin sawmna mawm tak dawng mahse, sum chu a ngaih pawimawh ber a nih loh thu a sawi a, South Korean forward hian Premier League khelh chhunzawm a duh.

Kum 30 mi Son hi Karim Benzema laluttu Saudi Pro League club Al-Ittihad nen sawizawm an ni a, Spurs manager hlui Nuno Espirito Santo enkawl team hian Son hi kum khata pound maktaduai 25.6 hlawhtir an inhuam.

Mahse, Spurs-a kum khata pound maktaduai 9.9 vel hlawh nia an sawi Son chuan, "Premier League-ah hian tih tur tam tak ka la nei. Sum hi tun dinhmunah chuan ka tana pawimawh ber a ni hran lo a, nuam ti taka football khelh a, ka league nuam tih bera hun hman hi ka duh a ni," a ti.

Al-Ittihad hi Newcastle United neitu Saudi Arabia Public Investment Fund-in June thlaa Saudi club pali a lei zingah an tel a, sum an ngah avangin European football lam an hawi.

Saudi-ah hian Ronaldo a awm sa bakah tun hnaiah Benzema, N'Golo Kante leh Reuben Neves te hoin sum a tam avangin an pan bawk a, European football-a player langsar tak tak nen sawizawm an ni mek.

Son-a tana pawimawh ber erawh hmingṭhat a ni a, season hmasa inelna hrang hranga match 47 a khelh aṭanga goal 14 khungtu Son hian English top flight league-ah hnathawh zawh loh a la nei niah a ngai.

Mi tam takin Asian player piang tawh zinga ṭha ber ang hiala an chhal Son hian kum 2015 khan Bayer Leverkusen aṭangin Spurs hi a zawm a, match 372-a goal 145 khungsakin, assist vawi 80 a nei a, 2021-22 season khan goal 23 khungin top scorer a ni hial.

Player langsar leh coach langsar tam tak nen Saudi sawi zawm ni mah se, Son hma hian Steven Gerrard chuan Saudi a pan loh tur thu a lo tichiang tawh bawk. Aston Villa boss hlui hi Al-Ettifaq chuan an dawr a, mahse, a hnar a ni.