Semifinal-ah Chhinga Veng an lut
Tata SK 712 Pro Volleyball League semifinal khel tur team pathum a hriat ta. Chhinga Veng Spikers chuan Tuichangral 3-1 (25-23, 25-22, 24-26, 25-22) a hnehin a thiam zual pali zingah an awmhmuh an remfel ve leh ta.
Tualchhung volleyball inelna sang leh lian berah hian - Thutak Nunpuitu Team (TNT) leh Hunthar ten semifinal an lut fel tawh; Hunthar an luh ve leh tak avangin hmunruak pakhat chauh a awm tawh tihna a ni.
Nizan khan Tuipuiral leh champion lai Durtlang North te an inkhel a, result kan hre hman lo. Team pahnih inkhela a chak lo zawk tan semifinal beiseina a thamral zui ang, a chak tan erawh beisei tur a la awm dawn.
Chhinga Veng an chak
PVL 2021-ah Chhinga Veng Spikers an champion a, season hmasa khan champion chungin inlan mah se hneh nei loin an mualpho. Kuminah champion tumin an rawn kir leh a, match li an khelh tawh china vawi thum chakin an boruak a kang leh ta hle.
R. Dengṭhuama Indoor Stadium, Mualpuia inkhelah Javed Khan a hmuhnawn. Rajasthan spiker hian a tawp lam boruak sanga point panga zinga pathum a hmu a, a pumpuiah point 35 hlawh chhuakin D3 Business Player of the Match atan thlan a ni.
Javed Khan bakah hian champion lai Durtlang North aṭanga an lakluh Lalbiakmuana a thawhhlawk, ani hian point 17 a hlap chhuak - vawi thum chauh tihsual a neih avangin hnehna an chan theih nan a ṭangkai hle.
Buaina tenau
Tuichangral tan chak loh a pawi thui thei, set thumna tir lamah Saidingpuia Sailo chuan vawi hnih hlap tla zawnin bul an ṭan fuh hle, a tir lamah 4-0 in an sang fal. Mahse, Spikers-in bei letin an lehpel a, set thum la zawn thei turin 20-16-in hma an hruai hman.
Mahse, thapui thawha ṭang Tuichangral lamin set thumna an la. Set hnuhnung berah team pahnih an inbei tawk viau, 20-20 a nih laiin Tuichangral tan Vinod Khatkar chuan a vaw thla a, a hnuah service laiin an awmna hmun a dik lo tiin assistant referee-in Chhinga Veng point a paihsak.
Lungawi lo takin an sawisel a, ching fel mai lo in eng emaw chen inkhel chawlh lailawk a ngai. Thutlukna kal tlangpuiin 22-20-in Tuichangral an sang a, mahse hun pawimawh laiah Javed leh Biakmuana te inlarin Spikers an chakpui ta zawk a ni.
BVT laka tlawm Power Dept an tla
Hmeichhe inelna lamah Bethlehem Vengthlang chuan nomawi kawl lai humhim an tum ruh hle. Thawhṭanni tlai khan Tata SK 712 Pro Volleyball League-ah Power Department Sporting Club chu 3-0 (25-23, 25-16, 25-19) in an sawp.
An chak avangin BVT hian semifinal an lut a, chak lo Power Dept. SC erawh match li an khelh tawhah chak an la neih ve miah loh avangin tualchhung volleyball inelna sang berah hian beisei an nei thei tawh lo.
Team paruk inel tan khelh hmabak match khat ṭheuh an nei chungin semifinal khel tur a hriat kim tawh. Luangmual, Kanan, BVT leh Bungkawn te an tlang a, league round khelh tur an la neih avangin table-a an dinhmun tur tak erawh sawi chian theih a la ni lo thung.
