Jude Bellingham tana duhthusam ram Real Madrid

Real Madrid player thar Jude Bellingham chuan Spanish club-in an duh tih a hriat khan lawm avanga awm ngaihna a hriat loh thu a sawi chhuak a, "Ka thidang ṭep a ni," a ti!

Kum 19 mi Bellingham hian Borussia Dortmund aṭangin Real Madrid hi pound maktaduai 88.5-in a zawm a, a khelh ṭhat dan a zirin a man hi pound maktaduai 115 thlenga sang chho thei tur a ni.

English midfielder chuan, "England aṭangin min duhtu club an awm tih hi chu ka hre reng ṭhin a, ka tan chuan thil pangngai ang mai a ni tawh. Mahse, ka pain, 'Real Madrid-in an duh che,' tia min hrilh kha chu mak ka ti takzet.

"Ka pain kha thu min hrilhna kha thla 12 emaw 15 emaw liam ta vel kha a ni tawh ang. Ka hmul thi a ding sung sung a, ka thidang ṭep a ni. Real-te ang team tana khelh hi chu kan beisei ngam ngai loh a ni," a ti a, Real a pan thei chu a ngaihlu hle.

Sum aiah football

Kum 19 mi lek la ni mah se Bellingham hian Real-ah hian kar khatah £220,000 vel a hlawh dawn nia sawi a awm a, kum ruk chhung atan contract a ziah avangin £70mtd vel a hlawh hman dawn tihna a ni - Dortmund-ah khan kar khatah £110,000 a hlawh niin an sawi.

Hetiang boruak karah hian Real midfielder Toni Kroos chuan Bellingham hi fimkhur turin a lo chah lawk a, Kroos chuan, "Sum tam tak uma rawn kal, mahse, career thlah ta pawh kan nei," a ti a, Eden Hazard ang maia thamral a hlauhawm thu a sawinaah an ngai.

Mahse, Bundesliga player of the season-a thlan hlim Bellingham chuan, "Sum hi ka tana hlu ber a ni lo a, thutlukna ka siamna kawngah sum ka ngaihtuah ngai lo - ka ngaihtuah ngai bawk hek lo ang. Football hi nuam tih vang liau liaua khel ka ni," a ti.

Liverpool nen pawha sawizawm hlawh hman midfielder chuan, "Real chungchanga ka ngaihdan ka sawi nghal a, thutlukna ka siam tawh kha chuan engkim kha fel thuai se, ka duh mai. Team dang hi an chhia emaw, an ṭha emaw lam ka sawi lo a, mahse, Madrid hi club ropui ber an ni," a ti nghal - Barcelona, in lo ngaithla maw?

Nomawi chawi turin

Kum 17 mi lek ni chunga Birmingham City chhuahsan a, £25mtd-a Dortmund zawmtu Bellingham chuan champion nomawi chawi tura Real chu pan a nih thu a sawi - league-ah elpui atan Barcelona leh Atletico Madrid an nei tih theihnghilh loh a ṭha.

Bellingham chuan, "Madrid ang club ropui leh he club tana hnathawktu, fan-te hian kum tina nomawi chawi hi an phu a ni. Kuminah La Liga leh Champions League nomawi an chawi thei lo - mahse, hei hi chinfel pui ka duh a ni.

"Kum tin heng nomawite hi an hnaih reng thei. Manchester City pawhin season duhawm tak an hmang a, mahse, kha khan hlawhtlin châkna min pe nasa a ni," a ti a, treble champion City anga season khata nomawi pathum chawi ve a châk.

Real hian Champions League semifinal lut mah se Manchester City ngam loin an tla a, La Liga-ah an el ber Barcelona ngam loin pahnihnaah season an khar bawk.

Hnar har Real

Real-ah hian English player Laurie Cunningham, Steve McManaman, David Beckham, Jonathan Woodgate leh Michael Owen te an lo nei tawh a, Woodgate leh Owen hi chu an hlawhchham - Bellingham hian eng ang takin nge hun a hman ve dawn tih chu hunin a hril ang.

Bellingham hi kar hmasa Ningani khan media hmaah phochhuah a ni a, Birmingham, Dortmund leh England national team-a a hun hman duhawmte media hmanga phochhuah a ni - Real president Florentino Perez chuan, "Khawvela player ṭha ber pawlin min rawn zawm a, kan tan chuan ni lawmawm bik a ni," a ti.

England tana vawi 24 inlan tawh Bellingham chuan, "He club hi a ropui êm avang ringawta zawm ka ni lo. Club ropui tak a ni ngei a, mahse, club hmachhawpte zawk kha min hip bertu chu a ni. 'Real Madrid kan ni a, min lo zawm rawh,' an ti ringawt lo.

"Lo ti ta pawh ni se, ka tan chuan zawm maina tham chu a ni tho. Mahse, chu zawng ai chuan an ngaihtuahna leh beiseina te khan min hneh êm a, kan tan hnar phal rual a ni lo," a ti a, "Champions League 2022 final-a Liverpool an hneh lai pawh kha ka en a, kha pawh khan he club hi min zawmtir châk zual a ni," a ti.

Kane & Mbappe?

Real Madrid hi Tottenham Hotspur striker Harry Kane leh Paris St-Germain chhuahsan tur Kylian Mbappe nen sawizawm an ni a, Bellingham chuan player pahnih hma hun chungchangah sawi theih a neih loh thu a sawi.

Bellingham chuan, "Harry Kane chungchang hi keia lo sawi tur a ni lo. World Class player a ni a, national team-ah ka captain a ni bawk. Player a nihna leh a mimal ang tak pawhin ka ngaina hle - eng pawh thleng se, keia lo sawi tur awmin ka hre lo," a ti.

English midfielder chuan Mbappe chungchang pawh sawi langin, "Kane leh Mbappe hi player ṭha tak, an position-a khawvela ṭha ber ve ve an ni. Mahse, engmah sawi theih ka nei lo a, an dinhmun pawh ka chiang lo.

"An chungchang thu hi internet leh twitter lamah pawh ka lo hmu ve. Mahse, ka transfer thuleng chungchang khan zirtir min nei a nih ngai chuan, hmuh hmasak apiang awih loh hi a ni hial ang. Kylian Mbappe-te ang chu tuin nge maw khelhpui châk lo ang le?" a ti.

Boruak sang

Manchester City-in Aston Villa aṭanga attacking midfielder Jack Grealish an lakluh khan £100mtd an seng a, Bellingham hian an khelh ṭhat chuan Grealish-a man hi khumin, English player man to ber a ni thei dawn.

Hei chauh a ni lo - Real-in euro maktaduai 115-a an lak Eden Hazard dawta Real tana player man to a ni a, kum 20 tling lo player zinga man to pathumna a ni bawk. Pressure a sang lo thei lo ang.

Mahse, Bellingham chuan, "Kan man chungchang hi ka ngaihtuah lo a, kan ngaihven zawng a ni lo. Ka tan chuan eng zat man nge ka nih lam hi a pawimawh lo a, ka tum chu a ngai reng - chu chu Real tana nomawi chawi a, khawvela team langsar ber an nih theih nana puih zel hi a ni.

"Footballer ka ni a, dan hremi emaw sum enkawltu emaw ka ni lo a, ka hna chu khelmuala hna ṭha tak thawh a ni," a ti a, a man zatin pressure a siam loh thu a sawi - Bellingham hian Real Madrid legend Zinedine Zidane-a hak hnu jersey number 5 Real tan hian a ha ang.