Pep leh Man City hun a thleng ta - Treble Champion

Manchester City hun a thleng a, English club hian an la chawi ngai loh Champions League nomawi an chawi ṭumah Premier League leh FA Cup an chawi bawk. Pep Guardiola hote hi Manchester United hnua English club zinga treble champion leh hmasa ber an ni a, Spanish manager hian Barcelona a enkawl laiin Catalan club hi a treble champion pui tawh bawk.

Inrinni zan khan Istanbul-ah Man City-in Inter Milan an hmachhawn a, Rodri goal hmangin 1-0 in an chak. Tunah chuan Pep-a sawiselna 'Barcelona bak Champions League nomawi a chawipui thei lo' tih ṭawngkam chu hman zui theih a ni ta lo a, Spanish manager ropuizia pawm mai loh chu football ngainatute tan tih theih dang a awm ta lo.

PL leh FA

UCL final ngaihnawmna belhchhahtu chu Man City-in Istanbul an pan hmain Premier League leh FA Cup-ah an champion. Premier League-ah hun rei zawk Arsenal-in hma hruai mah se City an beidawng duh lo a, a tawpah an dingchang ta zawk.

FA Cup final-ah a vawi khat nan Manchester Derby hmuh a ni a, Manchester United-in an hmelma City-in an record ropui an nihrual loh theih nan chelhna remchang an nei. Mahse, Wembley Stadium-ah Pep-a hote an chungnung zawk a, Ilkay Gundogan-a goal hnih hmangin Man United an hneh.

Final chu

Man City-in treble champion beiseiin Istanbul an pan a, UCL nomawi chawi an châkna nasa takin a pun phah. Pep Guardiola pawhin final boruak sangah a ngaihtuahna a hmang uchuak tawh lo. Final-a Chelsea an hneh loh ṭumin defensive midfielder a chhawr lo a, Inter hmachhawn turah erawh pahnih ngawt a chhawr - Rodri leh John Stones an ding dun.

Attacking game khel ṭhin Pep-a pawhin goal venhim a ngai pawimawh a, chutihrualin a khelh duh dana khel thei a duhsak bawk. Real Madrid laka che ṭha Kyle Walker chu bench-ah a dah ngam a, tun season-a a player rin zawk Nathan Ake-a'n bul a ṭan.

City ang thoin Inter Milan manager Simone Inzaghi pawhin thutlukna danglam a siam lo. Tun season UCL-a a chhawr ngunte bawk a rawn luhtir a, Romelu Lukaku pawh bench-ah a awm.

Tactical battle

Man City-in final thleng turin hneh loh an tawng lo a, goal 31 zet an khung bawk. Hei vang hian final-a bul ṭan ṭha zawk an ni pawh a mak lo a, chutihrualin Inzaghi kaihhruai Nerazzurri an inremphui ṭha hle.

Mipui mit fukna Haaland an veng uluk a, City chance neih ṭhat hmasak chu Bernardo Silva ke aṭanga chhuak a ni. Portuguese midfielder Silva a vannei tawk lo a, goal zawnah a pet lo bawk.

Minute 27-naah Kevin De Bruyne ball pek ṭha chu Haaland-a'n chang fuhin Norwegian striker hian goal-ah pet mah se keeper Andre Onana dinna a dik avangin Inter keeper tan a harsa lo.

Mahse, tun season-a assist vawi 31 zet nei De Bruyne hi a inhliam zui a, minute 36-na lekah lakchhuah a ngai a, a aia lut chu Phil Foden a ni. Minute 45 chhungin City-in goal an khung lo a, Inter an tumah an hlawhtling zawkah a ngaih theih. Nerazzurri captain Marcelo Brozovic a khel ṭha hle.

A hming Rodri

Second half-ah Manuel Akanji back pass sual vangin Inter Milan-in chance an nei a, Lautaro Martínez-a'n Edin Dzeko thlaktu Romelu Lukaku pek aiin goal-a pet a thlang a, a tisual.

Minute 68-naah erawh Akanji-a'n Bernardo Silva umluh turin box chhungah ṭha takin a pe a, Portuguese midfielder cross hian Inter player a per hnuah ball per chu Rodri-a'n chiang zetin a pet goal a, keeper Onana tan tih theih a awm lo.

City tlarhnung an muthlu zui a, box chhungah ball an sawhtir. Ball sawt kang leh chiah chu Federico Dimarco-a'n keeper Ederson-a khum turin a tauh kul a, crossbar a per. Hemi per hi Dimarco bawkin a tauh lehnghal a, a dangtu chu Lukaku a ni! Goal khung tura lut Lukaku-a'n goal thei tur a dang.

De Bruyne thlaktu Foden-a'n a hun ṭha neih a khung lo a, hun tawp hma thlengin City an hlauhthawn phah. Minute 88-naah Brozovic-a ball vawrhluh chu substitute Robin Gosens-a'n box chhunga awm Lukaku tan ṭha takin tauh mah se Belgian striker hian keeper Ederson tauh per nan a hmang.

City an ṭang tluan a, Rodri goal hmangin an chak. English club hi châk zawka tura rinkai ni mah se chak turin vanneihna an mamawh a, Inter leh Lukaku te erawh an vanduai thung.

Pep-a a ropui

Man City an ropui a, nomawi lian pathum an chawi. Cityzens-in tun dinhmun an thlen theihna chhan chu coach danglam bik Pep Guardiola a ni a, Spanish manager hian fak a phu.

Premier League striker ropui ber zinga mi Thierry Henry chuan, "Khawvel manager piang tawha ropui ber i ni," tiin hmai chhanah Pep hi a hrilh a, hei hian a ropuizia a sawifiah.

Henry ngaihdan ṭawmpuitu mi ṭhahnem tak an awm ngei ang. Pep-a'n nomawi lian tham 17 a chawi tawh a, nomawi aṭanga teh pawhin a ropui. Chutihrualin football chik mi ṭhenkhat chuan nomawi vang ni loin football kalhmang a thlak vanga ropui ber a nih thu an sawi thung.

Treble champion zawhah Barcelona chhul chhuak Pep chuan, "Real Madrid fimkhur ru. UCL nomawi 13-in kan pha lo che u a, kan rawn um dawn che u. In lo muthlu a nih ngat chuan kan um phak ang che u," tiin Catalan club hmelma Real Madrid a chhaih.

Kum 52 mi Pep hi a ṭawng uang a ni thei a, thutak a ni thei bawk. September 2002-a Sir Alex Ferguson-a'n Liverpool chunga an awm tur thu a sawi khan thu uar satliah ve mai a ang a, mahse Scottish manager hian Reds chunga Man United a dah hnuah football manager hna a chawlhsan a ni.

Champion kalkawng

Group Stage

Man City hi Borussia Dortmund, Sevilla leh Copenhagen te nen group khatah an awm. Dortmund hi team ṭha an ni a, an vanneih ṭum ni se Bundesliga champion thei an ni. Sevilla pawh pathumna an ni a, an tlak hnuah Europa League nomawi an chawi.

Man City hi an group aṭangin hmahruaitu an ni a, chak loh nei lo mah se Copenhagen leh Borussia Dortmund nen hian ṭum khat ve ve goal awm loin an inhnehtawk a, a bakah zawng an chak. Group Stage-ah City-in goal 14 khungin goal hnih chauh an chhuah a, goal nga hi Erling Haaland khung a ni.

Last 16

Man City hian RB Leipzig an hmachhawn a, first leg hi Leipzig Stadium-ah khelh niin 1-1 in an inhnehtawk. Mak tih a hlawh hle. Mahse, Etihad Stadium-ah City hian 7-0 in an sawp a, Haaland-a'n goal nga ngawt a khung.

Quarterfinal

Pep Guardiola-a'n quarterfinal-ah a club hlui Bayern Munich a hmachhawn a, Etihad Stadium-ah first leg khelh niin 3-0 in Thomas Tuchel-a enkawl Bavarians an sawp. Allianz Arena-ah 1-1 in an inhnehtawk thung a, Haaland-a'n penalty hlah mah se first leg leh second leg-ah goal khat ve ve a khung.

Semifinal

City-in semifinal-ah UCL-a record nei ṭha ber Real Madrid an hmachhawn a, Pep-a hote hi rinkai ni mah se Santiago Bernabeu-ah 1-1 in an inhnehtawk. Etihad Stadium-ah second leg khelh a ni a, City ṭha zawk hmuh a ni. Pep-a hoten 4-0 in Real an sawp a, aggregate-ah 5-1 in an chak. Goal khung khawl Haaland-a'n goal a khung miah lo!

Final

English club Liverpool-in Milan club AC Milan an hneh tawhna Istanbul, Turkey-ah City-in Milan club Inter Milan an hmachhawn a, Rodri goal hmangin hnehna an chang. A vawi khat nan Champions League-ah Man City an champion.

Goal khung tam ber Haaland

Tun season Champions League-a goal khung tam ber chu Erling Haaland a ni a, match 11 aṭangin goal 12 a khung. Norwegian striker hian quarterfinal khelh zawhah goal 12 a khung tawh a, match thum khelh hmabak a la neih avangin season khata goal khung tam ber record a siam pawh an ring hial. Mahse, Haaland hian semifinal leh final-ah goal a khung tawh lo.

Chutihrualin Haaland hian City tana a season hmasa berah Premier League, FA Cup leh UCL-ah a champion pui a; PL leh UCL-ah goal khung tam ber a nih bakah Premier League Player leh Young Player of the Season atan thlan a ni ve ve a, FWA Footballer of the Year a ni bawk. Tun season-ah Haaland hian match 53 a khel a, goal 52 a khung.