Netflix documentary: Nicolas Anelka inpuanna Real Madrid hawtu, Liverpool-a châm duh!

Mizo football ngaina inti zingah Nicolas Anelka hre lo kan awm kher lo ang. French striker hi a thiamna piah lamah kawh mawh bawl hrat vang te, thuawih loh vang tein hriat a hlawh a, a nungchang ṭhat loh avanga a nih tur ang ni phak lo hiala ngaih a ni. 

Internet kaltlanga movie leh en tur dang hmuhnawm chhawp chhuak ṭhintu Netflix chuan Anelka documentary a tichhuak thar a, a hmingah 'Anelka: Misunderstood' tih a ni - khawvelin Anelka a hmuh dan a lo dik tawk lohzia an puang chhuak a ni ber. 

Nih tur ang ni phak lo ang hiala an sawi chungin Anelka hian Euro, Champions League, Premier League leh FA Cup-ah nomawi erawh a chawi tho a, sawi nep theih a ni lo. Chutihrual chuan he striker hi a khelhna West Brom-in an ban a, club khelhnaah a titau a, hrem a tawk a, chanchin tam tak a nei. Indian Super League-a Mumbai City tan thlenga rawn khel striker hian a sawi ngai loh tam tak a puang chhuak ta. 

Kum 1997 khan Anelka hian kum 17 mi lek niin Arsenal a zawm a, Arsene Wenger-a enkawl team tan 1997-98 season-ah Premier League leh FA Cup nomawi a chawi. 

Anelka chuan Arsene chungchang sawiin, "Ka theihna zawng zawng ka hlan avangin Arsene kha ka tan a awm reng ṭhin niin ka hria," a ti a, mahse kum 1999 khan Real Madrid chu pound maktaduai 29.75 velin a zawm. 

French striker chuan, "Real Madrid ka zawm khan star nih awmzia ka hria a, chu tak chu ka haw em em a ni. Ka duhna hmuna ka ṭhut te hian player dang an lokal ang a, an ṭhutna hmun a nih thu sawiin min hnawt kiang ṭhin," a ti!

Anelka hian Real-a hun hmasa lam thla nga chu goal khung lo a, club training a zawm duh lo lui bawk. Anelka chuan, "Ui ang maiin min en a ni," a ti a, "Inpekna tur thil tam tak a awm a, a awmzia man turin ka naupang hret a ni," a ti bawk. 

Anelka hian Real Madrid-ah season khat chauh hun a hman hnuin Paris Saint-Germain a zawm a, Ligue 1 lamah a hming a chher leh hnuin kum 2002 khan French coach Gerard Houllier enkawlna hnuaia khel turin Liverpool a zawm. 

Anelka hian season tawp thleng khel tura a zawm club hi, "Ka khelhna tur dik tak a ni," tiin a sawi a, mahse season a zawh meuh chuan Anelka unaupa leh a manager ni bawk chuan club dang a lo biak avangin Houllier hian a chelh lo. 

French striker chuan, "Liverpool fan-te khan ka cham duh loah an ngai a, mahse a ni lo. Kha thil thleng kha hrehawm ka ti a, Anfield-ah khan hna ropui tak ka thawk thei turah ka ngai a ni," a ti. 

Anelka hian Manchester City pan zuiin ropui takin a khel a, Liverpool-in World Cup 2002 All Star team-a lang phak El Hadji Diouf an lalut thung - season hnih chhungin match 79-ah goal ruk chauh a khung!

Anelka hian City a chhuahsan hnuah Fenerbahce, Bolton Wanderers, Chelsea, Shanghai Shenhua, Juventus, West Brom leh Mumbai City tan a khel a, Baggies tana a khelh laia a chanchin kha ngaihnawm a tling. 

West Brom tana goal a khung hmasak ber ṭumin Anelka hian French comedian lar leh a ṭhianpa ni bawk Dieudonne M'bala M'bala tih lar 'quenelle' hmangin a goal khung a lawm a, hrem zui a ni. Quenelle hi Juda hnam huatna leh Nazi salute (tih danglam hret) anga sawi a ni a, Anelka hi FA disciplinary panel chuan match nga khel lo tur leh £80,000 chawi turin an hrem. 

FA chuan Anelka hian a goal lawm dan hi Juda hnam a huat vanga ti a nih loh thu erawh an sawi tel tho a, mahse chi inthliarna lam hawi a nih miau avangin hrem a ni ta tho. 

French striker chuan West Brom tana a goal khung a lawm dan chu manager Steve Clarke nen an inhmuhthiam loh avanga ti a nih thu a sawi a, a match hmasa berah Clarke hian a thlak avanga a lungawi lohna lantirna a nih thu a sawi. 

Clarke nen an inhmuhthiam loh avang hian Anelka hi chhawr lohin a awm zui a, match ngaah a zawnin an tlawm. Scottish coach hi ban a ni a, team-ah Anelka a tel zui. Mahse, French striker-in Clarke a tihel kher a, a pawi zo ta. Baggies lamin an striker hi an suspend a, FA lamin an chhui duhtawk loin an chhui ve bawk - Anelka bu tut a chhuak thut a, Baggies a chhuahsan thu a puang a, West Brom-in an striker chet dan a dik loh thu sawiin ngaihdam dil turin an ti!

Anelka chuan, "Ka inkhelh loh reng hnuah goal ka khung a, ka lawm ve mai a ni. Steve Clarke chungchang ka sawi duh ngai lo a, kha vang khan amah tih el nana ti ka ni tih an hre lo a ni. Ka tan chuan chi inthliarna lam a ni lo a, mak ka ti hle zawk a ni," tiin a sawi.

World Cup 2010 khan France coach Raymond Domenech nen an inhmuhthiam loh avangin Anelka hi thawn haw a ni a, squad pumpui chuan an player pui hi ṭanin training an zawm duh lo hial. 

French chanchinbu lar L'Equipe chuan an phek hmaah Raymond Domenech leh Anelka inhauhna ṭawngkam an ziak a, ṭawngkam bawlhhlawh tak a nih avangin ziah chhawn a rem lo!

Mahse, Anelka chuan media lam tarlan ang a nih loh thu sawiin, "He thu hi ka sawi tak tak ni se chuan ka sawi tiin ka pawm mai ang, tih chu mipuiin an hre vek a ni," a ti a, Domenech nena an buaina a pawm chungin a ṭawngkam hman anga an sawi erawh a hman loh thu a sawi. Netflix documentary-in 'Anelka: Misunderstood' a tih angin French striker chu thlirna tlang dang aṭangin min thlirpui a, thutlukna siam erawh kan chanvo a ni e.