Nipui transfer-in min hmuak - a ‘hot’ dawn!

European football season-in tawp lam a hnaih - Mizotena kan ngaihven ber Premier League season khar a ni tawh a, Bundesliga season a tawp tawh bawk.

La Liga, Serie A leh Ligue 1 ten match khat ṭheuh khelh tur an la bak a, mahse, heng league-ah te hian champion tur an chian vek tawh avangin a 'hot' tawk tawh lo.

Hetiang boruak karah hian football ngainatute titi ber chu nipui transfer a ni leh tawh a, player che thei nia langte an hraw hlawm em avangin a awm lo hran lo.

Paris St-Germain a chhuahsan dawn tih a chian tawh miau avangin Lionel Messi chu ngaihven hlawh langsar a ni a, ani bakah hian Jude Bellingham, Harry Kane, Declan Rice leh Victor Osimhen te chu hming ri ring an ni.

Khawiah maw Messi?

PSG-a a hun tawp lamah Messi a tla tlum lo. May 3 khan club chuan kar hnih ngawt an hriatpui loha Saudi Arabia-a a zin avangin an hrem a, PSG tana a match khelh leh hmasa berah French club ṭantuten an au el nasa hle.

Barcelona chuan an player hlui hi laklet an tum thu an sawi chamchi a, club president Joan Laporta chu Messi lakkir an tum thu sawitu langsar a ni bawk - mahse, 'mah se' tih a ngai tlat!

Catalan club hian season khatah player hlawh atan pound maktaduai 530 an seng a, hei hi £177mtd tala an tihhniam a ṭul avangin player hlawh hnem uchuak Messi tan kir a harsa mai thei.

Major League Soccer club Inter Miami hming a ri ve reng a, Saudi club Al-Hilal chuan kum khat an hnena khel a, £350mtd hlawh turin an sawm mek bawk.

Jude Bellingham

Kum 19 mi lek nia Borussia Dortmund captain armband hreng thei naupang ber record siamtu hian nipuiah Signal Iduna Park a chhuahsan ngei dawn niin a lang.

Liverpool chu duhtu langsar ni mah se a man a tam tham avangin an inhnukdawk tawh. Reds boss Jurgen Klopp chuan, "Naupang, krismas atana Ferarri ngen ang chauh kan ni anga sin," a ti!

Bundesliga player of the season-a thlan hlim hi Real Madrid chuan indawrna an lo neihpui tawh a, La Liga leh Champions League lama an nomawi chântu team hian £89mtd-in an ngam.

Mahse, German club hian £130mtd aia tlawma chhuahtir an tum lo nia sawi a ni - Bellingham hian tun season inelna hrang hrangah match 42 khela goal 14 khungin, assist vawi sarih a nei.

Harry Kane

Kum 29 mi a ni tawh a, khawvela striker langsar ber pawl ni siin Harry Kane-a'n nomawi chawi a la nei lo - kum khat cham turin contract a la nei a, Spurs tan chelh luih zel ai chuan man to taka hralh theih a nih laia hralh a finthlak mai thei.

Kane hi kum 2021 nipui lai khan Manchester City nen sawizawm an ni a, mahse, Spurs-in an chhuah duh tlat loh avangin Etihad Stadium a pan thei lo.

English striker hian Spurs tan inelna hrang hrangah match 435 khela goal 280 khungin, Premier League-a goal khung hnem ber Alan Shearer (260 goals) khum turin league-ah goal 47 chiah khung a ngai tawh bawk.

A theihna thlirin Kane-a'n nomawi chawi a phu a, mahse, amah duhtu langsar Manchester United hi nomawi chawi theihna tur a ni em, tih pawh zawhna chhan harsa a ni - April-a United nen 2-2 a an inhnehtawk khan United fan-ten, "June-ah kan inhmu dawn nia," tiin Kane an au a, an hnena khel turin an duh.

Declan Rice

Europa League semifinal second leg-a AZ Alkmaar an hneh hma khan West Ham manager David Moyes chuan Declan Rice chhuah a rin thu a sawi a, kum 24 mi midfielder hian Hammers-in contract thar ziak tura an sawmna zawng zawng a hnar vek.

Rice hi a kum la tlem viau mah se England tan match 41 ngawt a inlan der tawh a, mahse, amah duhtu tan chuan insen huai chu a ngai ve viau ang - Moyes chuan £150mtd aia tlawma hralh an tum loh thu a lo sawi tawh.

English midfielder hian Premier League-a pahnihna Arsenal zawm a hreh lo niin an sawi a, Gunners hian an duh tak tak a nih chuan sum an insen huam a ṭul dawn.

West Ham hian June 7, zan dar 12:30-ah Europa Conference League final khel turin Fiorentina an lenchilh dawn a, an chak chuan Rice hi Bobby Moore-a'n kum 1965-a Cup Winners' Cup nomawi a chawi hnua Hammers captain zinga European nomawi chawi leh hmasa ber a ni ang.

Victor Osimhen

Napoli-in tun season-a Serie A nomawi an chawi theih chhan langsar chu Victor Osimhen a ni - tun season Serie A-ah match 31 khela goal 25 khung tawhin, top scorer a ni.

Italian football expert James Horncastle chuan Osimhen man hi £90mtd aia a tlem loh tur thu a sawi a, Chelsea, Arsenal, Manchester United, Liverpool, PSG leh Real Madrid ten an duh vek.

March thla khan Osimhen hian, "Ka duhthusam ang ngeia Premier League-a ka la khelh ve theih nan ka thawkrim ṭhin hle," tiin a lo sawi tawh a, amah duhtu English club ho an hlim ang.

Mahse, Chelsea legend Didier Drogba ngaisangtu, kum 2016-a Arsenal aia Wolfsburg thlangtu hian eng ang takin nge duhthlanna a siam dawn hriatthiam a har.

Mount? Mbappe? Maddison?

Mason Mount-a'n season thar hman zawhah Chelsea-a a contract a hmang zo dawn a, Stamford Bridge-ah contract thar a ziak duh rih lo - United, Liverpool leh Arsenal nen sawizawm a ni. Chelsea chuan an midfielder hi £70mtd aia tlawma chhuahtir an tum lo.

Brighton & Hove Albion boss Roberto de Zerbi chuan a player Moises Caicedo leh Alexis Mac Allister ten level sang zawka khelh an phu thu a lo sawi tawh. Mahse, January khan midfielder Caicedo lalut tura Arsenal-in £70mtd-a an dawrna chu a lo hnar tawh.

Argentina tana World Cup nomawi chawitu Mac Allister pawh Liverpool nen sawizawm an ni a, kum 24 mi midfielder hian Reds hi inremna a neihpui tawh ang hialin khawthlang media ṭhenkhat chuan an tarlang.

Premier League aṭanga Leicester City tlakpuitu James Maddison chu Newcastle United leh Tottenham Hotspur nen sawizawm a ni a, season thara PSG-a contract hmang zo tur Kylian Mbappe pawh chhuak thei dinhmunah a ding a, Neymar leh United an sawizawm bawk.