Vawiinah CYMA Football last 32 khelh zawh a ni dawn; En châkawm ITI Veng Vs Chanmari; Ramhlun North Vs Sialhawk

LBS Suzuki 21st Inter Branch YMA Football Tournament-ah team ṭha 32 chauh an dam tawh a, vawiin hian last 32 hi khelmual parukah khelh zawh a ni nghal dawn.

Thawhṭanni zan khan LPS Auditorium, Zarkawtah last 32 'draw' neih a ni a, team ṭha an insemrual ṭha hle. Champion tur team tan vawi nga chak a la ngai a, fixture awm dan thlirin eng team tan pawh kawng awlsam a awm lo.

ITI Veng Vs Chanmari

RG Stadium-a inkhel hi LPS1-in an live dawn a, inkhel tur pawh a hmuhnawm hlawm khawp ang. Team ṭha ber zinga chhal K. Malsawmkima enkawl Bawngkawnin Bairabi Jt YMA an hmachhawn dawn.

Bawngkawnah hian ISL-ah pawh player langsar ni pha Isak Vanlalruatfela leh MPL best forward MC Malsawmzuala bakah player ṭha ṭhahnem tak an awm a, chak tura rinkai an ni. Bairabi hian last 32 thleng turin Ramhlun Sports Complex leh Kulikawn sawp mah se vanneihna tel lo chuan Bawngkawn hneh a har ang.

ITI Veng leh Chanmari inkhel tur erawh chak zawk tur hriatthiam a har hle. Chanmari-ah MPL best player Lalrinchhana Tochhawng a la awm a, Rochhingpuia'n la hoin Jerry Mawihmingthanga leh Lalrinliana Hnamte te an awm. ITI Veng lamin Edmund Lalrindika, M. Lalrintluanga, Joseph Lalvenhima leh Lalrempuia te an kawl a, Chanmari tan zuam chi an ni lo ang.

Vawi thum champion tawh Electric Vengin Durtlang an hmachhawn dawn a, Durtlangin player ṭha an ngah avangin an buk a rit zawk. Chutihrualin team lian pahnih inkhel tih hriat a ṭha a, last 16-ah pakhat zawk tan chauh hmunruak a awm.

Lammualah Goal

Last 32-ah cricket thiam veng Ramhlun Venglai an rawn lang nawlh a, Thingsultliah Jt lakah fiahin an awm dawn. Khawzawl Vengthar an chhe lo a, South Sabual lakah rinkai zawk an ni. Inkhel pahnihah hian goal a luh tam a rinawm.

Chutihrualin match hnuhnung bera inkhel tur Republic Veng leh Chalrang hi football-ah sulhnu an inneih ṭhat hleih a, kum 2005 champion Republic Veng tan in 150 vel khua hneh loh hi mualphona a tling ang.

Armed Vengah Armed Veng

Champion ngun ber Armed Vengin an mual an chang fuh a, an khingpui tur Tlangnuam tan hnehna chan tur chuan goal venhim ṭhat a pawimawh ang. Inkhel hmasa berah YMA Mission Veng leh College Veng te an inhmachhawn dawn a, College Veng buk rit hret mah se Mission Veng ball pet thiam Ramfangzauva'n freekick aṭangin goal thum a khung tawh tih hriat a ṭha.

Match hnuhnung berah Lengpui Model leh Venghnuai te an inkhel dawn a, MPL club nei Venghnuai hian player ṭha an kawl - Lengpui Model tan fimkhur a ṭul ang.

Muallungthuah mipui hmuh châk

Draw neih laia thawm nei ring ber chu Sialhawk an ni. Sialhawk hi Ramhlun North nen an pawh fuh chiah a, thawm ṭha tak a nei nghal - he video hi a darh ṭha hle.

Inter Village Football 2022-ah khan Sialhawk hian Ramhlun North hi semifinal-ah an hneh a, R. Laldanmawia leh a ṭhiante hian chak nawn an inbeisei. Ramhlun North lamin phuba lak an tum dawn a, football ngainatuten Muallungthu lamah an hawi ang.

Sialhawk leh Ramhhlun North inkhelh hma hian Siphir leh Darlung an inkhel dawn a, an intluk tawk viau tura ngaih a ni. BVT leh Marpara pawh an inkhel dawn a, Lalsangzuala Hmar kaihhruai BVT tan harsa tur awmin a lang lo.

MFA Ground lam hi

MFA Ground, Sairang Dintharah Aizawl khaw pawn aṭanga champion rinkai ni pha Hualngohmun leh Lengpui an inlan dawn. Hualngohmun hian an ṭha tih finfiah nan Venghlui an sawp tawh a, chutihrualin an khingpui tur Keifang Venglai hi coach H. Lalhlimpuia enkawl a nih bakah winger tlan chak Lalbiakhlua (Biaktea) an kawl.

Lengpuiin Sairang khaw lumah buaina an neih a rinawm lo a, player an neih ṭhat bawk avangin Seling tan tawh an khirh ang. Seling tan hnehna chang turin game plan fuh a ngai dawn a ni.

Lengpuiah match hnih

Salem Vengin round of 32 lut turin team ṭha Farkawn lakah phuba an la a, 3-2 in an hneh. Salem Veng hian Lengpuiah Lungdai an hmachhawn dawn a, chak tura rin zawk ni mah se an khingpui tur hi dah hniam theih a ni lo. Inter Village Football 2022-ah khan Lungdai hian Lengpuiah Kolasib Tumpui an hneh a, helai hmunah hian an mikhual lo.

Thenzawl Jt leh Mualpui ten Lengpuia match hnuhnung ber an khel dawn. Thenzawl Jt hi Ramhlun South hnehtu an nih avangin an ṭha tih a chiang a, Mualpui erawh khingpui fuh vanga last 32-a inpetkaia ngaih theih an ni. Mualpui tan team ṭha Thenzawl Jt hneh a harsa ang.