Nistelrooy-a'n PSV a chhuahsan

PSV Eindhoven head coach Ruud van Nistelrooy chuan league match khat chiah khelh tur an nei tawh tihin Dutch team a chhuahsan a, club lamin an tarlan dan chuan Nistelrooy hi PSV lakah a lungawi lo.

PSV chuan thuchhuah siamin, "Van Nistelrooy chuan club chhungkua aṭanga thlawpna hmu ṭha tawk loa inngaiin, first team squad leh coaching staff-te hnenah coach a nihna aṭanga a ban nghal thu a sawi a ni," an ti a, Pathianniah a hma hun sawipui tum mah se an rin loh taka a ban thu an sawi.

Manchester United legend hian PSV aṭanga a coaching career ṭanin, June 2013 khan Under-17 enkawlsakin bul a ṭan a, February 2016 khan U17, U19 leh reserve team tan striker coach-ah a ṭang.

Hetih chhung hian Nistelrooy hian Netherlands national team-ah assistant coach hna a chelh tel bawk a, June 2018 khan PSV-ah bawk kirin, Under-19 coach hna a thawk.

March 2022 khan Roger Schmidt thlakin, PSV senior team enkawl hna a ṭan a, kum thum chhung atan contract a ziak. Mahse, Dutch legend hian kum khat chauh a enkawl hman tihin a bansan leh ta zawk.

Kum 46 mi Nistelrooy hian PSV kaihruai rei lo mah se Dutch Cup leh Dutch Super Cup-ah champion nomawi a chawipui a, league-ah pahnihna dinhmun luah mekin champion tawh Feyenoord chu point 10-in an phak lo mek.

PSV hian tun season-ah league match khat khelh la hmabakin, Pathianni zan dar 6:00 hian AZ Alkmaar an lenchilh dawn - season thara Champions League khel chiang turin draw result an mamawh a, mahse, inlungrual an mamawh vanglai takin coach Nistelrooy a bang!

Dutch club chuan, "PSV chuan Nistelrooy-a thutlukna hi pawi a ti takzet a, Johan Cruyff Shield leh Dutch Cup nomawi min chawipui avangin a chungah kan lawm takzet bawk," an ti a, Eredivisie-ah pahnihna ni chunga season khar an beisei thu an sawi bawk.

PSV hi assistant coach Fred Rutten chuan season tawp thleng chu a enkawl ve leh phawt dawn a ni.