Raheem Sterling tan hmun a awm rih lo!
England manager Gareth Southgate chuan June thlaa Euro 2024 qualifier khel tur squad a puang - Chelsea forward Raheem Sterling hming a lan loh laiin Eberechi Eze erawh a vawi khat nan koh a ni thung.
Southgate chuan Sterling a koh loh chhan chu inbiakremna a nih thu a sawi. Blues forward hi a malpui hliam dam tawh mah se ngai a la awh lo deuh a, a ṭhat dan berin a la khel chhuak leh thei rih lo a ni.
Tlarhnung lama khel turin Trent Alexander-Arnold, Tyrone Mings leh Lewis Dunk te koh an ni a, hliam vangin Chelsea player pathum Reece James, Mason Mount leh Ben Chilwell bakah Tottenham defender Eric Dier te koh an ni lo.
Arsenal defender Ben White, Everton defender Conor Coady leh AC Milan tlarhnung dawltu Fikayo Tomori te tan hmun a awm lo. White hi chuan World Cup lai khan buaina a nei a, kohna dawn beisei ngam a harsa tawh ang.
Manchester City player pali - John Stones, Kyle Walker, Phil Foden, Jack Grealish leh Kalvin Phillips te pawh koh an ni. Mahse, Citizens hian Champions League final khelh tur an la neih avangin squad an zawm tlai deuh ang.
Three Lions squad an puana sawi zui hlawh pakhat chu Eberechi Eze a ni. Crystal Palace forward hi kum bithliah inelna lamah chuan ram tan a inlan tawh, senior huangah erawh an koh vawi khatna a ni - Premier League an match hnuhnung pariatah goal ruk a khung theih avangin koh a phu.
Manchester United tana khelhna chang mumal lo Harry Maguire hming a lang. Lisandro Martinez, Raphael Varane leh Victor Lindelof te an awm avangin Maguire-a'n hmun pawimawh a chang phak tawh lo.
Erik ten Hag-a'n a defender ṭhenkhat an hliam pawhin Maguire khelh tir ai chuan a laia Luke Shaw dah pawh a thlan chang a awm. Club lamah rin hlawh lo mah se England team lamah chuan atan hmun a la awm tho a ni.
Southgate chuan, "Marc Guehi, Lewis Dunk leh Tyrone Mings te kan nei. Anni ho hian European football huangah tawnhriat nei lo mah se season ṭha tak an hmang a, ram tana khel phak tur chuan inelna a hautak dawn," tiin Maguire chu bul a ṭan ngei dawn em, tih a sawi thei rih lo.
England hian June 16 hian Malta an lenchilh dawn a, chumi hnuah North Macedonia chu Old Trafford-ah an lo mikhual zui leh ang. Three Lions hian an match hmasa lamah Italy leh Ukraine te an hneh tawh avangin Group C hmahruaitu an ni mek.
England Squad:
Goalkeepers: Sam Johnstone (Crystal Palace), Jordan Pickford (Everton), Aaron Ramsdale (Arsenal)
Defenders: Trent Alexander-Arnold (Liverpool), Lewis Dunk (Brighton & Hove Albion), Marc Guehi (Crystal Palace), Harry Maguire (Manchester United), Tyrone Mings (Aston Villa), Luke Shaw (Manchester United), John Stones (Manchester City), Kieran Trippier (Newcastle United), Kyle Walker (Manchester City)
Midfielders: Jude Bellingham (Borussia Dortmund), Eberechi Eze (Crystal Palace), Conor Gallagher (Chelsea), Jordan Henderson (Liverpool), Kalvin Phillips (Manchester City), Declan Rice (West Ham United)
Forwards: Phil Foden (Manchester City), Jack Grealish (Manchester City), Harry Kane (Tottenham Hotspur), James Maddison (Leicester City), Marcus Rashford (Manchester United), Bukayo Saka (Arsenal), Callum Wilson (Newcastle United)