Real player leh fan ten Vinicius Jr an thlawp

La Liga-a beisei tur nei tawh lo Real Madrid chuan Nilaini zan khan league-ah Rayo Vallecano chu 2-1 in an hneh a, Karim Benzema leh Rodrygo ten Real tan goal khat ve ve an khung.

Real tan Benzema hian minute 31-naah goal hmahruai a khung a, an chakpui mai dawn niin a lang hman. Mahse, mikhual team Vallecano tan Raul de Tomas chuan minute 84-naah si phurh a sut a, 1-1 a inkhelh a tawp ringtu an tam zawk.

Mahse, hun tawp nan minute khat chiah a awm tawh tihah Rodrygo a inlar ve leh a, chakna goal a rawn khung - team pahnih tan result-in awmzia a nei thui tawh lo a, inkhelh zawha sawi hlawh zawk chu Vinicius Jr chanchin a ni.

Valencia nen an intawn ṭuma chi inthliarna lam hawia auh el tawktu Vinicius hi khelmualah inlan lo mah se, player leh fan ten an thlawpna an lantir a, an mikhual Vallecano pawhin Vinicius lam an ṭang tih an pholang.

Buaina lo kiang la...

Santiago Bernabeu-ah Real player-ten 'Vini Jr 20' tih chuanna jersey ha chungin khelmual an lut a, team pahnih captain-ten chi inthliarna dona lantirna captain armband an hreng ve ve bawk.

Real fan-ten Vinicius an thlawpzia lantir nan banner lian tak, "Vinicius somos todos, basta ya" tih inziahna chu an tarlang a, "Kan vai hian Vinicius vek kan ni - a tawk zozai ta e," tihna a ni - mihring chu angkhat vek kan nih thu an tarlang.

Inkhelh hmain team pahnih player-ten banner an keng chhuak a, chutah chuan, "Racistas, Fuera Del Futbol," tih a inziak - chumi awmzia chu, "Football-ah chi inthliarna tan hmun a awm lo," tih a ni.

Hei mai a ni lo. Minute 20 a nihin fan-te chu Vinicius hming lamin an au rual - Vini hian Real tan jersey number 20 a ha a, an player duat lai hi Real fan-ten an chhan hle.

Ka lawm e

Vinicius hi Valencia nen an inkhelh ṭum hian nasa taka auh nawmnah a ni a, fans tam tak ṭawngkam hman chu ziah chhawn leh inthlahrunawm khawp a ni - Santiago Bernabeu-ah erawh amah thlawpna leh ṭanna hlir hmuh tur a awm.

Brazilian forward hian Valencia nen an inkhelah khan red card pek a ni a, a boruak a rit hle. Mahse, Brazil international red card hmuh hi sut leh a ni a, Vallecano laka a inlan loh chhan hi hliam a neih vang a ni.

Spanish Football Federation (RFEF) chuan referee red card pek chu sut mah se, referee erawh an chhan a, "A tan thil thleng tak kha hriatchian a harsa em em a ni," an ti.

Vinicius hian inkhelh hmaah khelmuala lutin, fan-te chu lawmthu sawina chibai a buk bawk a, kum 22 mi forward hian instagram lamah, "Ka hmangaih vek che u, ka lawm, ka lawm, ka lawm takzet e," tih a ziak a ni.

Valencia hremna

Mestalla Stadium buaina avang hian Valencia chu match nga chhung an stadium-a hmun ṭhenkhat chu khar rih tura hrem an ni a, €45,000 (Rs. 39,94,114) chawi tura tih an ni bawk. Mahse, hrem an nih danah Valencia an lungawi lo a, stadium-a hmun ṭhenkhat khar a ni tur chu an khinlet tur thu an sawi.

Valencia coach Ruben Baraja chuan, "Valencia fan-te leh Mestalla hi kan nih lohnaa tarlan kan rem ti dawn lo," a ti a, "Player-ten thil dik lo huaisen taka an do let hi engti kawng pawhin ka thlawp tlat a, mahse, kan nih lohna anga sawi kan ni erawh kan do ve tlat tho a ni," a ti bawk - club pumpuiin fans ṭhenkhat chet dan an hmingchhiatpui chu ṭha a ti lo.

Hetihlai hian Vinicius-a'n na taka Spain leh La Liga a sawiselna ngai thei lo a, twitter lama chhanglettu, La Liga president Javier Tebas chuan a chet danah ngaihdam a dil ve bawk. Tebas hian Vinicius hi, "La Liga i sawisel hmain hrechiang phawt rawh," tiin a kap let a ni.

Mahse, La Liga hotupa chuan ngaihdam dilin, "Vinicius beih tum ka ni lo a, mahse, mipuiin chuti zawnga an ngai tlat a nih chuan ngaihdam ka dil a ngai a ni," a ti a, thil awmzia sawifiah tum mai a nih thu a sawi bawk.