Chanmari West-in goal 13 an khung

LBS Suzuki 21st Inter Village Inter Branch YMA Football Tournament-ah nimin khan inkhel hnuhnawm ṭhahnem tak a awm a, 2012 finalist Chanmari West-in goal 13 ngawt an khung.

Chanmari West hi tun hmaa an player pawimawh ṭhin Lalsangzuala (Valbuanga), Zion Lalramluaha leh R. Zoramthara ten an enkawl a, Zemabawk South 13-0 in an sawp.

MSSC Ground, Lengpuia inkhel dangah khawtual team Lengpui leh Chalrangin Chaltlang leh Laipuitlang te 5-0 ve vein an hneh.

Aizawl khaw pawn aṭanga CYMA Football-a champion tawh Lengpui tan I League player F. Lalremsanga'n hattrick a siam.

1st Bn MAP Ground, Armed Vengah Ramhlun North-in Thakthing 5-2 in an hneh a, first half-ah 2-2 a nih avangin boruak a nung hman hle. Hun tawpah erawh All Mizoram Inter Village Football-ah pawh semifinal thleng pha Ramhlun North an chak chiang.

Thawm nei ring Sialhawkin Tuikhurhlu 5-2 in an hneh. Sialhawk hi nikum Inter Village Football-a finalist an ni a, tun ṭum pawh hian team ṭha zinga mi an ni.

Ramhlun Venglaiin Upper Republic 2-1 in an hneh bawk. MFA Ground, Sairang Dinthar-ah hming langsar Ramhlun South an inlan a, Reiek 4-1 in an hneh. Mizo striker ṭha Malsawmfela'n goal hnih a khung.

Vawi hnih champion tawh Dinthar pawhin Hunthar nen 1-1 a an inhnethawk hnuah penalty shootout hmangin hnehna an chang. Huntharah hian Vanlalbiaa Chhangte leh Brandon VL Remdika te an khelh avangin Dinthar tan hnehna chan hi a hlu hle.

College Vengin Tuikual South 5-3 in an hneh. Lalpekhlua'n College Veng tan hattrick a siam a, Tuikual South-in hun tawp thlengin huaisen takin an khel a ni.