Tualchhung volleyball inelna lian leh ngaihhlut ber - Tata SK 712 Pro Volleyball League a hnai a, nimin khan Hawla Indoor Stadium Conference Hall, Republic Vengthlangah Mizoram State Sports Council Secretary John Ṭanpuia chuan fixture leh handbook a tlangzarh.
PVL hi June 2, Zirtawpni zanah khelh ṭan a ni dawn. Match hmasa berah hian season hmasa final-a intawng Durtlang North leh Thutak Nunpuitu Team (TNT) an inhmachhawn nghal dawn, inkhel a hmuhnawm nghal khawp ang.
John Ṭanpuia chuan, "Volleyball hi Mizoten kan tui em em a, thingtlang kilkhawr berah pawh kal ila hmun rem laiah inkhelhna a awm zel a ni. Sports Council-in dressing room leh gallery awm telna tur volleyball court thar 30 a siam mek a, volleyball stadium din turin hma a la mek bawk a, hma lam hun eng tak a nei a ni," a ti.
Tun season PVL hi R. Dengṭhuama Indoor Stadium, Mualpuiah vek khelh a ni dawn. June 8, Ningani tlai dar 3:30-ah 2019 champion Chhinga Veng Spikers leh kai thar Tuichangral an intum dawn a, zan dar 8:00-ah vawi khat aia tam champion thei awm chhun Hunthar leh Tuichangral intawngin mipa team parukin round khatna an khel zo dawn a ni.
Hmeichhe team ṭha parukin title an inchuh dawn bawk a. Nikum final-ah Bethlehem Vengthlangin 18-25, 25-21, 25-14, 25-20 (3-1)-in Bungkawn an hneh a, June 3, Inrinni zan dar 8:00-ah hmeichhe league inkhel hmasa berah an intawng lehnghal dawn a ni.
Mipa team ruk - Durtlang North, TNT, Hunthar, Chhinga Veng Spikers, Tuichangral leh Tuipuiral. Hmeichhia team pasarih - Bethlehem Vengthlang, Bungkawn, Durtlang, Kanan, Power Department Sporting Club, Armed Veng South leh Luangmual an inel ang.