Europa League khel tur Brighton

Brighton & Hove Albion chuan Premier League champion thar Manchester City an chelh a, Amex Stadium-a point khat hlu tak an hlawhchhuah avangin Seagulls-in Europa league an khel dawn. Nilaini zan inkhelah hian Phil Foden hmangin City-in goal an khung hmasa a, first half-ah vek Julio Encisco hmangin mualneituin an sut, 1-1 in inkhel a tawp.

1-1

Man City-in nomawi an chawi tawh a, Pep Guardiola pawhin player a siksawi hret. Bul ṭantu zingah Rico Lewis telin Rodri pawh defence laiah a ding a, player ṭhenkhatin hahdamna hun nei bawk mah se Erling Haaland leh Kevin de Bruyne ten bul an ṭan.

Norwegian striker Haaland hian a record belhchhahna turin chance ṭha ṭum hnih a nei a, a chance neih hmasak hnai tak aṭangin a tauh lut lo. A vawi hnihna pawh goalkeeper chauh hmachhawn mah se Haaland hian a khung thei chuang lo.

Goal hmaah Haaland a hmui lo a, minute 25-naah erawh Phil Foden pein English midfielder hian chiang zetin a pet goal. Seagulls hian City hi an rum ṭhaih ve reng tho a, Danny Welbeck-a'n freekick aṭangin crossbar a pet per. Kaoru Mitoma pawhin a su lut a, mah se Japanese forward hian a kut a hman avangin pawmsak a ni lo.

Minute 38-naah Encisco-a'n box pawn aṭangin kawh zetin a pet goal a, keeper Stefan Ortega tan dan ngaihna a awm lo. First half-ah 1-1 a ni a, second half-ah goal a lut lo chungin goal chacne erawh a awm. Haaland-a goal khung chu offside vangin pawm a ni lo. Chutihrualin Brighton hian vawi 20 ngawt shot an nei a, Citizens-in tun seasona-a shot an tawn hnem ber a ni.

Europa khelh phu

Brighton manager Roberto de Zerbi chuan, "Ka ngaihdanah chuan Man City hi khawvel team ṭha ber an ni. Inkhel pawh a harsa a, chutihrualin point hmuh kan phu a, Europa League khelh kan phu bawk," tiin an khelh danah a lungawi thu a sawi.

Alexis Mac Allister leh Moises Caicedo hmalam hun sawiin De Zerbi chuan, "An hmalam hun ka hriatpui lo. Ka ngaihdanah chuan hei aia level sang zawka khelh hi an phu. Chutihrualin inelna lian pali kan hmachhawn dawn avangin player ṭha kan lakluh ve ngei a ṭul ang," tiin a sawi. Brighton star pahnih Mac Allister leh Caicedo ten club lian zawk an zawm hmel hle.