Inter Milan chuan a kum zawnin Coppa Italia nomawi an chawi. Goal an phurh hmasak hnuah Inter hian Lautaro Martinez-a goal hnih hmangin an chhanglet a - Fiorentina chu 2-1 a hnehin Simone Inzaghi naute an champion.
Italian club-te knockout hmanga an inelna Coppa Italia-ah hian Inter Milan hi vawi kua an champion tling ta chiah a, record nei ṭha ber chu vawi 14 champion tawh Juventus an ni thung. An inkar a zim zel.
Martinez-a goal hnih
Stadio Olimpico-a inkhelah Fiorentina lam an che fuh hmasa, inkhel ṭan aṭanga minute thumna lekah Nico Gonzales chuan hnai zet aṭangin goal hmahruai a khung - box chhungah Inter tlarhnung an fimkhur tawk lo deuh.
Inter an muthlu rei lo, an insiamṭha zui nghal. Midfielder Marcelo Brozovic-a ball pek chu Martinez-a'n angle zim zet aṭangin a khung a, minute 29-naah si phurh an sut fel leh nghal der - Inzaghi naute an phur chhunzawm bawk.
Italian midfielder Nicolo Barella-a'n a kangin Martinez tan ball a vawrh - Fiorentina defender lamin Argentine forward hi ball lo chuh buai viau mah se ball kang lai a hlap lut, keeper Pietro Terracciano tan dan ngaihna a awm tawh lo.
Martinez hian Nerazzurri tan match 235 a khelh aṭangin goal 101 a khung tling der tawh a, nomawi chi hrang panga a chawipui tawh bawk - season khar nan Champions League final khelh hmabak an la nei bawk.
Season a la zo lo
Simone Inzaghi-a'n club a enkawl chinah final a ngam hle, nomawi inchuhna inkhel a hmachhawn hnuhnung pasarihah hnehna a chang vek. Inter leh Lazio a enkawl hlawhtling hle tihna a ni, inrintawkna pawh a nei sang tawh hle ang.
Inter Milan manager Inzaghi chuan, "Fiorentina hi team ṭha tak niin harsatna pawh min siamsak hnem. Team ṭha tak hneh chunga kan champion thei hi a lawmawm, nomawi kan duh tak kan humhim thei pawh hi lawmna tizualtu a ni bawk.
"Tun season kan hmang zo tihna erawh a la ni lo. Serie A match hmabak pahnih kan neih hi final ang tho a ni a, chumi hnuin Istanbul-ah UCL final kan khel dawn bawk, a ṭha thei ang bera a hmawr bawk kan tum ang," a ti.
Serie A lamah Nerazzurri hi pathumna an ni mek, an chunga awm Lazio an phak lohna chu point hnih a ni - khelh hmabak pahnih an la neih avangin pahnihna ni turin kawng a la inhawng zau. Man City nen UCL final an khelh tur pawh khawvel hmuh chak a ni ang.
Zhang a lawm
Season an hman ṭhat tawk loh avangin Inter Milan hian an coach Simone Inzaghi ban an tum hman a, club thuneitu lam pawhin an manager chungchanga an ngaihdan hi an sawi lang hman, mah se tunah erawh an ngaihdan a danglam leh tawh ngei ang.
Inter president Steven Zhang chuan, "Kan player leh coaching staff laka ka lawmzia hi thuin a sawifiah phak lo ang. Mitin mai hian hnehna chan an duh a, champion châka kan tuihâl avangin hlawhtlinna pawh kan chang a ni," a ti.
Chinese sumdawng hausa Zhang-a'n thuneihna a chan hnuah nomawi chi hrang panga an chawi tling ta. Serie A bakah Coppa Italia leh Italian Supercup vawi hnih ve ve an la tawh - Inter president awm tawh zinga nomawi chawi hnem pathumna a ni ta hial.
Fimkhur a ngai
Fiorentina manager Vincenzo Italiano chuan Inter Milan an hneh lo chu an tan zirlai a nih tur thu a sawi. Italian club hian Europa Conference League final an lut a, nomawi inchuhna inkhelah West Ham United an la hmachhawn leh dawn.
Italiano chuan, "Kan chak loh avangin pawi ta ti, mahse tun season chhungin Serie A match pahnih leh Europa Conference League final khelh tur kan la nei a, heng match pathumah hian rilru zawng zawng kan hmang tur a ni ang," a ti.
European football inelna hrang hrangah Fiorentina hian final vawi li an lut tawh. UEFA competition palia final lut thei hmasa ber an hi hial, chutihrualin Europe-ah kum 33 hnua final an khelh lehna hmasa ber tur a nih avangin an tan thil thar tluk a ni ang.