Manchester City-in chhiarkawp dan ang thlapin Premier League la champion lo mah se match thum khelh hmabakah vawi khat chauh chak a ngaih avangin champion ngei tura ngaih an ni.
Pep Guardiola hote hian Pathianni zan dar 8:30 hian Chelsea an mikhual dawn. City tan tun season-a an 'home match' hnuhnung ber a nih avangin champion an nemnghet thei a nih chuan inkhelh banah nomawi an chawi nghal dawn niin an khawthlang media-ten an ziak.
City tan tunkara nomawi chawi turin Chelsea hneh a ṭul a, chutihrualin Nottingham Forest laka Arsenal an chak lo a nih chuan inkhelh hma hauhin Pep-a hote hian champion an nemnghet thei bawk. Gunners leh Forest hi zanin dar 10:00 hian City Ground-ah an inkhel ang.
City phur lai
Man City-in Champions League final lut turin Real Madrid 4-0 in an sawp a, Chelsea an hmachhawnna tur hi UCL-a record nei ṭha ber an sawpna hmun Etihad Stadium-ah tho a ni dawn.
Blues hian sum hmang tam mah se tun season-ah chet ṭhat aiin chet chhiat an ngah zawk a, Frank Lampard hnuaiah khelh dan nghet an la nei thei lo. Season dang ni se, Chelsea hi City point chhuhsak thei tur an ni a, tun season-ah erawh City muala point khat an hmuh theih a rinawm loh.
Haaland leh record
City-in Real Madrid 4-0 zetin sawp mah se Erling Haaland-a'n goal a khung lo. Premier League-ah erawh Norwegian striker hian match 33 aṭangin goal 36 a khung tawh a, record siam tawh sa tih ṭhat nan goal khung leh ngei a tum ang.
Haaland hian inelna hrang hrangah goal 52 a khung tawh a, hei hi an club record chauh ni loin Premier League club-a khel zinga season khata goal khung tam ber a ni bawk.
Chutihrualin Premier League awm hmain Dixie Dean-a'n kum 1927-28 daih tawh khan First Division-ah goal 60 a khung a, hei erawh khum a harsa thung ang.
Player ṭha dang
Pep-a'n kartawpah player chhawr ngun deuhte a awltir a nih pawhin City squad a chhah. Real Madrid lakah pawh bench aṭangin Riyad Mahrez, Phil Foden leh Julian Alvarez te an la luhtir thei tlat.
Alvarez hian World Cup nomawi a chawi tawh ringawt a ni lo a, Argentina tan player pawimawh a ni. City-ah Haaland a awm avangin Alvarez hi a khel tam tawk lo a, match 46 inlan mah se inkhel bul a ṭan chu match 21 chauh a ni. Heti chung hian Alvarez hian goal 16 a khung a, assist vawi li a nei tawh bawk.
City hian Premier League nomawi an chawi zawhah FA Cup leh UCL final an la khel dawn a, Manchester United hnua English club zinga treble champion thei hmasa ber an ni. FA Cup leh UCL-ah pawh team ṭha Manchester United leh Inter Milan an hmachhawn dawn chungin champion tura rinkai an ni ve ve.