Champions League-a club ropui ber chu Real Madrid an ni a, Los Blancos hi Europe inelna sang berah hian champion lai ni bawk mah se Premier League champion Manchester City hmaah dawl zawrin an zawr.
Pep Guardiola kaihhruai Man City-in Etihad Stadium-ah Real an ching phar a, Spanish manager hnathawh ropui ziah hmuhin a awm. English club tan Bernardo Silva-a'n goal hnih a khung bakah Manuel Akanji leh substitute Julian Alvarez ten goal khat ve ve an khung bawk. City-in 4-0 in hnehna an chang a, first leg nena belhkhawmin 5-1 in an chak.
Man City-in Pep-a hnuaiah a vawi hnih nan UCL final an thleng a, a vawi khat nan champion an tum dawn. Cityzens hian Ataturk Olympic Stadium, Istanbul-ah June 10, Inrinni zan dar 12:30 hian Inter Milan nen nomawi an inchuh ang.
Ngaihdan nghet nei 'Pep'
Man City-in UCL final-a Chelsea an hneh loh ṭum khan Pep Guardiola-a'n Premier League nomawi an chawi tawh tho avangin league-ah player a siksawi nasa hle.
Tun season-ah erawh Pep a chesual nawn lo a, khelh dan nghet a nei. Spanish manager-in player hnathawh dan thlak hret mah se Santiago Bernabeu-a player chhawr-te bawk a ring nawn a, quarterfinal-a Bayern Munich an hneh ṭuma an khelh dan nen pawh inzul vek.
Carlo Ancelotti-a'n hremna hmang zo Eder Militao bul a ṭantir nghal a, first leg-a Erling Haaland dah ṭhatu Antonio Rudiger chu bench-ah a dah thung. Italian manager hian kum danga Pep-a an sawiselna ṭhin angin, ngaihtuahna a seng tam hret niin a lang.
City ṭha zawk
Santiago Bernabeu-ah Real Madrid-in goal an khung hmasa a, second leg-ah erawh Spanish club hian a tir aṭangin goal venhim hna an thawk. 
Mual vei lamah Jack Grealish a hmuhnawm a, pound maktaduai 100 man phu ta hle. Minute 13-naah Grealish-a cross ṭha chu hnai tak aṭangin Haaland-a'n a tauh mah se keeper Thibaut Courtois-a'n a dang.
Haaland hian minute 21-naah hnai tak aṭangin goal-ah tauh leh a, Norwegian striker hian tauh ṭha mah se Courtois-a'n hming chher nan a hmang. 
City-in mual sir aṭangin an nawr a, minute 23-naah mual lai aṭangin an nawr thut. Kevin de Bruyne ball fing chu Bernardo Silva-a'n rilru fim takin goal-ah a chantir.
Real-in chance an nei meuh lo a, an chance nei pawh 'long shot'. Toni Kroos-a'n hla tak aṭangin crossbar a pet per a, City tlarhnung dem theih a ni lo - German midfielder theihna la sanzia a lang.
City an chungnung a, box chhungah ball an inpe ngam. Minute 37-naah Grealish-a ball pek chu Ilkay Gundogan-a'n goal-ah petin hemi per hi Bernardo Silva-a'n a kaw laiah tak a tauh goal. First half-ah 2-0 a ni a, City-in hma an hruai an phu hle.
Thawnthu thar
City-in nikum khan semifinal-ah Real hi an hmachhawn tawh a, an mualah 4-3 in an hneh. Santiago Bernabeu-ah pawh City hi goal khung hmasa zawk an ni a, aggregate-ah 5-3 in minute 89-na thleng hma an hruai. Mahse, Real-in siphurh an sut zo a, extra time-ah Carlo Ancelotti hote an chak hial.
Tun ṭumah Real hian ṭan phatah David Alaba freekick hmangin chance rawn nei mah se Pep-a leh a hote an tihsualna ngaiah an tisual nawn lo. 
Real-in beiseina an neih tawh loh nan City-in an nawr na chhunzawm a, Haaland-a vanneih zan ni se an khung belh ang. Norwegian striker hian keeper Courtois chauh a hmachhawn hnuah a khung lo.
Mahse, City-in De Bruyne an kawl miau a, minute 76-naah Belgian midfielder freekick chu Akanji-a'n a tauh lut. Freekick hi Bernardo Silva-a'n Eduardo Camavinga laka a hlawhchhuah a ni a, first leg-a fak hlawh Camavinga hi second leg-ah Portuguese midfielder hian a ching phar hle. English club an chak dawn tih a chiang tawh a, Phil Foden-a penetration pass chu Alvarez-a'n injury time-ah a khung belh leh bawk.
NGAIHNAWM
President a thinur Real Madrid khelh danah club president Florentino Perez a thinur a, Man City an hneh loh zawhah player pakhatmah a be lo niin khawthlang media ten an ziak. ––––––––––––––––––––––––––– Man City lakah Thibaut Courtois a che ṭha a, goal li chhuah mah se dem theih a ni lo. Belgian keeper hi inhliam chungin a khel niin Marca chuan an ziak a, Courtois hi Getafe an hmachhawn ṭumin a inhliam. ––––––––––––––––––––––––––– Kan inkhelh dan hi chik taka enlet a ṭulna pawh a awm lo a, a na takzet. Football-ah chuan hetiang hi a thleng ṭhin a, UCL semifinal-ah keini aia ṭha team kan hmachhawn a nih chuan kan tan final-ah hmun a awm lo. Season tharah UCL champion tumin kan rawn kir leh ang.
- Carlo Ancelotti, Real Madrid manager ––––––––––––––––––––––––––– Minute khatna aṭangin kan inpeih tih a lang. UCL final kan thlen avangin kan lawm. Player-te a khel ṭha chungchuang a, hetiang ang inelna lianah chuan Bernardo Silva a rawn lang leh ṭhin. Ka player hmuh tawha ṭha ber zinga mi a ni.
Mi hian Erling Haaland a chungchang hi an sawi nasa a, Rodri pawh hian kum ṭha tak a hmang. Tun dinhmunah Rodri aia midfielder ṭha a nawm pawh ka hre lo.
- Pep Guardiola, Manchester City manager ––––––––––––––––––––––––––– Pep Guardiola khan inkhelh hma darkar hnih thum a la awm khan min lo message a, 'Min ring rawh, kan hneh dawn' tih min rawn thawn.
- Rio Ferdinand, Man United defender hlui ––––––––––––––––––––––––––– Thil thlen dan kha a duhawm lo hle. Kan khel ṭha lo. Kan khelh tum danin kan khel chhuak lo a, kha aia ṭhaa khelh thei tur kan ni. City an chungnung zawk.
- Luka Modric, Real Madrid midfielder (mittui parawl chungin a sawi) ––––––––––––––––––––––––––– Real duh loh Alvarez Kum 12 liam ta khan Julian Alvarez chuan Real Madrid-ah trial la nei a, Spanish club hian an la lo. Argentine forward hian Real Madrid a hmachhawn hmasak berah goal a khung a, thla nga liam ta khan World Cup semifinal a khelh hmasak berah goal a khung tawh bawk. ––––––––––––––––––––––––––– Real Madrid hian Etihad Stadium-ah chak an la nei lo. November 2012 khan 1-1 in an inhnehtawk a, April 2016-ah 0-0 in an inhnehtawk. August 2020-ah 2-1 in City an chak a, April 2022-ah City bawk 4-3 in an chak. Tun ṭumah City 4-0 in an sawp a, Real-in Etihad Stadium-a match hnuhnung pathumah City an hneh lo vek. ––––––––––––––––––––––––––– Treble champion a hnai? Man City-in Premier League-a champion turin match khat chiah chak an mamawh tawh a, tunkar tawpah Chelsea an hneh chuan an champion dawn. FA Cup final-ah an hmelma Manchester United an hneh chuan an champion tawh a, Champions League-ah Inter Milan chiah hneh ngai tawh. Pep Guardiola hote hi treble champion turin match thum chiah chak a ngai tawh a, Manchester United hnua English club zinga treble champion hmasa ber ni thei dinhmunah an ding. Chutihrualin an hmelma Man United hian City treble champion tur hi an dal thei tih hriat a ṭha.