Seeded 32 awmna LBS Suzuki CYMA Football 2023

LBS Suzuki 21st CYMA Inter Branch YMA Football 2023 fixtures chu Thawhlehni zan khan Vanapa Hall-ah tlangzarh a ni a, team 145 hi group pariatah ṭhendarh niin seeded 16 an siam.

Chutihrualin, CYMA Football fixtures hi bihchian chuan team 32 chauh an dam (third round zawhah) hunah pawh ṭhat a ni dawn. Chumi awmzia chu group tin hi group paliah zel ṭhendarh leh an ni a, group tin aṭangin pali zel fixtures pawh ṭhatah hian an tel dawn tihna a ni.

Bye team 111

Football fixtures siam hian 'number sequence' pawimawh deuh a awm a, chu chu 2, 4, 8, 16, 32, 64, 128... hi a ni. Tun ṭumah hian team 145 an tel a, team 128 aia a tamna chu 17 a ni.

Hei vang hian first round-ah match 17 a awmin team 14 an inlan a, a bak zawng an bye. Round hmasa berah team 14 a inlan chuan team 111 an bye a, second round an lut nghal.

CYMA Football inelnaah hian artificial turf awmna chauh hman a ni nachungin Aizawl leh a chhehvelah artificial turf ground a ṭhahnem tawh a, first round hi ni hnih chhungin khelh zawh a ni dawn a, ni khatna aṭangin second round khel ṭan a ni dawn bawk.

Salem Veng Vs Farkawn

Fixtures pawh dan zawng zawng hi video en tur a awm vek a, fair taka pawh a ni. Hei vang tak hian group khatah team ṭha pakhat aia tam awmna a awm a, chung zinga en châkawm chu Salem Veng leh Farkawn te hi an ni.

Salem Veng leh Farkawn te hi an chak chho a nih chuan third round-ah an inkhel thei dawn. Nikuma All Mizoram Inter Village Football-ah khan team pahnih hi an inhmachhawn a, boruak a sang hle.

A tawpah Farkawnin penalty shootout hmangin Salem Veng hi an hneh. Tun ṭumah hian team pahnih hi a hma ai mahin an ṭha tawh zawka ngaih an ni a, an inkhel leh thei tur hi tualchhung football ngainate titi tui ber pakhat a tling.

Engtin zel?

CYMA Football inelna hnuhnung bera champion Chanmari chuan fourth round (last 32) thleng turin Zemabawk an hmachhawn thei. AMC Ward inelnaah Zemabawk awmna ward an champion tih hriat a ṭha.

Team langsar vut ni loah chuan Mission Veng leh College Veng te hi an tlo viau zel, third round-ah an inhmachhawn thei.

Group D-ah ITI Veng an seeded a, an group-ah Chhinga Veng leh Zemabawk North an awm avangin seeded ni loa group danga awm an châk zawk hial ang.

Social media-ah chauh ni lo, khelmual lamah pawh Sialhawk an che ṭha ṭhin. R. Laldanmawia te khua awmnaah hian Kawnpui Jt an awm ve tlat a, Mizoram pum huap inelnaa final thlen zawn a harsa dawn.

Record nei ṭha ber Armed Veng pawh champion tawh Kanan Veng te nen an awm ho a, Mizoram Police coach BS-a Colney hoa khel tur Armed Veng erawh harsatna nei loa an group patlang tura ngaih an ni tho.