Zanin hi football ngainatute tana men rei zan; Etihad Stadium-ah Man City vs Real Madrid

UEFA Champions League semifinal-ah Manchester City-in zanin dar 12:30 hian Etihad Stadium-ah Real Madrid an mikhual dawn. Santiago Bernabeu-ah team ṭha pahnih hi 1-1 in an inhnehtawk a, away goal rule a awm loh avangin zanina an inhnehtawk leh a nih chuan extra time bakah penalty shootout thlengin a hmuh theih ang.

Nizan khan semifinal hmasa zawkah Inter Milan leh AC Milan te an inkhel a, final-a City emaw Real emaw hmachhawn tur a hriat tawh. Chutihrualin zanina inkhel tur hi Milan derby ai pawha football ngainatute en châk zawk chu a ni.

Real nge nge

Man City-in season ṭha tak an hmang a, treble champion thei hial an ni. Pep Guardiola-a'n a naute a hrual ṭhat bawk avangin Man United legend Wayne Rooney phei chuan, "An sawp ang," tiin City chiang taka an chak tur thu a sawi.

Mahse, Champions League-ah chuan Real Madrid chu team dang daih an ni a, La Liga-ah Barcelona lakah nomawi chân mah se UCL-ah chuan inelna neitu ang hiala chhal theih an ni.

First leg-ah Real Madrid-in City lakah Vinicius Jr hmangin goal an khung hmasa a, City an hlauthawng hle. Kevin de Bruyne-a theihna san zarah English club-in siphurh an sut hram a, an goal khung khawl Erling Haaland phei chu Antonio Rudiger leh a ṭhianten an dah ṭha.

Los Blancos hi tawnhriat nei ṭha coach Carlo Ancelotti-a'n a ho a, Italian manager hian player a nih lai pawhin UCL nomawi hi ṭum hnih a chawi tawh. Manager a nih hnuah Ancelotti hian UCL nomawi vawi li a chawi tawh a, nomawi la chawi ngai lo City tan harsa tur chu an ni hrim hrim.

Ancelotti 'Game Plan'

Real-in squad an neih ṭhat avangin Ancelotti-a'n thutlukna harsa a siam a ṭul dawn. Santiago Bernabeu-ah inkhel thunun lai nei bawk mah se Etihad Stadium-ah chuan ball chang tlem zawk an nih a rinawm. Hemi avang hian Italian manager hi a fimkhur hret a nih pawhin a mak lo ang.

Kartawp inkhelah Real-in Getafe 1-0 in an hneh a, City inkhel thlir chungin player pawimawh ṭhahnem tak a awltir. Amaherawhchu Ancelotti a vanduai a, Camavinga a inhliam - Eithad Stadium-ah a inlan thei dawn em, tih a chiang lo.

Ancelotti hian first leg-ah hrem vangin Éder Militão an chhawr thei lo a, Rudiger leh David Alaba ten Haaland an ven ṭhat avangin Brazilian defender hian tu nge a thlak dawn tih hriatthiam a har - Alaba hi left back-ah chhawr theih a ni bawk. Ferland Mendy a dam tawh bawk.

Chutihrualin an khelh dan thlak hret a, first leg nen starting eleven a tidanglam dawn a nih chuan Rodrygo chu bench-ah awm tur bera ngaih a ni. Brazilian forward hi bench-ah a awm a nih chuan Camavinga midfield-ah a awm thei ang a, Karim Benzema leh Vini Jr te thlawp turin Federico Valverde a awm hma thei ang. Valverde sawn hma hian attack nat phah aiin tlarhnung tihphui lam a kawk.

City leh UCL

Man City-in first leg-ah kha chuan Premier League leh UCL an thlirkawp a, kartawp an chet ṭhat avangin Real Madrid nena an inkhelh turah chiah an insawrbing thei tawh.

Pep-a hote hian kartawp khan Everton 3-0 in an hneh a, Erling Haaland-a'n inrintawkna nei turin goal a khung leh ta bawk. Anmahni elpha ber Arsenal an chak loh avangin match thum khelh hmabakah point thum chauh hmuh a ngai tawh a, thil harsa a ni tawh lo.

Spanish manager Pep chuan, "Rugider a khel ṭha. Mahse, Haaland hi kum 22 mi lek a la ni. UCL semifinal a vawi khat khelhna a ni a, Bernabeu-ah inelna sangah defender, midfielder leh striker ṭha rual a hmachhawn. A vawi hnihnaah chuan a awlsam hret ang. Team angin deparment hrang hrangah hma kan sawn chuan Haaland tan hna a awlsam phah dawn a, Nilainiah chuan a awlsam hret ka ring," tiin Haaland a chhan.

Pep Guardiola hian Haaland a chet ṭhat theih nan player pawimawh Joao Cancelo pawh January transfer-ah a chhuahtir ngam a, Etihad Stadium-a Norwegian striker puala a game plan tur hi hmuh châkawm lai chu a ni.

Chutihrualin Haaland chauh hi pressure nei a ni lo a, Spanish manager ber hian pressure a ngah dawn. Pep hian Bayern Munich a enkawl laiin semifinal ṭum thum a lut a, Spanish club pathum Real Madrid, Atletico Madrid leh Barcelona a hneh lo.

City a enkawl hnuah pawh Pep hian UCL nomawi a la chawi chuang lo a, hemi avang hian uchuak hretin ngaihtuahna a seng leh thei bawk.

Semifinal second leg hi team ṭha leh player ṭha inbeihna ni mai loin manager ṭha inbeihna a ni tel dawn a, player ṭha zingah hian Kevin de Bruyne a langsar leh ṭhin tih hriat tel a ṭha bawk.