Arsenal beiseina a 'Thamral' ta!
Premier League la zo lo mah se, champion tur a chiang tiin a sawi ngam ta. Arsenal captain Martin Odegaard chuan Brighton an hneh loh hnuah an tan champion chu beisei ngam chi nia a hriat tawh loh thu a sawi.
Champion lai Manchester City chuan tlak hlau Everton 3-0 in an hneh a, an inkhel result hresain Arsenal an inlan. Mikel Arteta naute hi an mikhual Brighton lakah 3-0 in an tlawm ve thung.
Season tawp dawn champion tur inum boruak sangah Pep Guardiola naute an hriam zawk a, an hmaa ding apiang an hneh zel. Gunners erawh an ruh a no a, squad chhah tawk loh a lang - Citizens tan champion turin vawi khat chak chauh a ngai tawh.
Beiseina thamral
Season tir kha chuan Arsenal tan hian a sang zual pali zinga tel phak pawh beisei ngam a harsa, beisei phak baka ṭhain season an hmang a, champion hial an beisei ngam - hun rei tak chhung hmahruaitu an nih theih avangin an beisei pawh a sang hman hle.
Mahse, tun hnai an match hnuhnung pasarihah vawi hnih chiah an chak a, point 21 hmuh theihna aṭangin point kua chiah an hmu - hetihlai hian an elpui Man City erawh an chak vek thung si, hun pawimawhah an tawnhriat neih tlem an tuar.
Chak ngei ngei ngaihna inkhelah Brighton tlarhnung an su hawng thei lo a, goal khatna Julio Enciso-a'n a khung dawn laiin Gunners tlarhnungin rilru an pe tawk lo niin a lang, a hnua Deniz Undav leh Pervis Estupinan te goal chu Seagulls lam ṭhat vang a ni.
Gunners captain Martin Odegaard chuan, "A nihna takah chuan second half kan khelh dan kha ka hrethiam lo. Ka hmuh dan chuan beisei tur kan nei tawh loah ka ngai," a ti a, coach Arteta pawhin an dinhmun chu an pawm thiam mai a ngaih thu a sawi ve bawk.
Kum 2004 hnuah Arsenal hian Premier League nomawi an la chawi leh lo, an elpui club dang tena an fiamna 'Next Season' chu kuminah pawh an inhnemna neih chhun a ni leh ta - Champions League an khelh phak dawn avang erawh chuan an lawm ang.
Dan theih loh City
Pep Guardiola-a'n Real Madrid nen Champions League an khelh tur a ngaihtuah a, a player ṭha - Kevin De Bruyne, Bernardo Silva leh Jack Grealish te bench lamah a dah a, heti chung hian Phil Foden, Riyad Mahrez leh Julian Alvarez te an la lut thei tho.
Everton lamin tlarhnung an remphui ṭha viau a, counter attack chu an innghana a ni. Hun rei tak chhung chu Sean Dyche-a naute an inveng thei, mahse, midfielder Ilkay Gundogan-a'n a malpuia ball a dawn chu boruaka a awm laiin a bin lut.
Germany international goal a mawi a, a goal mawizia an sawi laiin Erling Haaland tauh luh tur a siamsak zui leh nghal. Second half-ah freekick pet lut zui lehin Citizens a chakpui - a mawng lama buai lai Toffees tan tih theih a awm ve tawh lo.
Inkhelh banah Guardiola chuan champion turin match hnih chauh chak an ngai tih a kut zungṭang hmangin fans a hmuh, mahse a beisei aia hmain thil a thleng thei dawn - Arsenal an tlawm avangin City hian Chelsea an hneh chuan an champion fel der ang.
EPL nomawi a chiang tiin a sawi ngam a, Champions League semifinal second leg pawh Etihad Stadium-a khel tur an nih avangin final lut turin beisei an nei sang. Inelna lian pahnih bakah hian FA Cup final an la hmabak bawk.