Spain mai ni lo, European football-ah pawh team ṭha ber ang hiala inngai tan chuan season thum chhung ngawt elpuiten league nomawi an chawi lai kha thlir a hrehawm ngawt ang - chu chu Barcelona thawnthu ngaihnawm lo chu a ni. 
Kum 2019 khan Barcelona-in La Liga nomawi an chawi a, mahse, hemi hnuah hian league nomawi an chawi leh tawh lo. Khelmualah an talbuai a, hei hi Covid-19 leh sum lam harsatnain a nangching zui. 
Barcelona tan champion sawi rik chu, 'khuarei' thil thleng tur sawina ang chauhah ngaih a ni a, an elpui club ṭantu tam takten fiamthu thawh nan an hmang a, an chalah chil an hnawmsak a ni ber. 
Mahse, kum 2023 a herchhuah meuh chuan La Liga-ah Barcelona an champion leh ta a, Spain-ah Catalan club aia thiam zawk an awm lo - Nangni Zion fate...ni lo, Barca ṭantute u, hlimin lam rawh u!
Catalan derby
Pathianni zan khan Barcelona-in khualmualah Espanyol an lenchilh a, hnehna an chan chuan match li khelh tur la nei chungin an champion dawn tih an chiang - minute 60 a tlin hmain goal li an khung der. 
Robert Lewandowski chuan first half-ah goal hnih khungin, rawlthar ṭhangduang Alejandro Balde chuan goal khat thawh belhin, second half-ah Jules Kounde chuan a belhchhah bawk. 
Espanyol-in goal li an chhuah hnuah Javier Puado leh Joselu hmangin chhanglet ve leh mah se, goal an chhuah hnem hret a, si phurh sut zo turin hunin a daih tawk tawh lo. 
Barca-in an Catalan pui club khelmualah champion an lawm a, Espanyol erawh tla mai thei dinhmunah an ding zui - table-ah 19-na an ni mek a, 17-na Real Valladolid chu match li khelh tur la awmah point liin an phak lo mek. 
Thutlukna dik lo
Barcelona hian 2018-19 season khan La Liga nomawi an chawi a, hetihlaia an coach chu Ernesto Valverde a ni. Barca hian phur takin season thar an hmachhawn a, mahse, January 4, 2020 khan coach Valverde chu an ban - an duhkhawp lo. 
Catalan club-in an club chanchina thutlukna pawi ber pawl an siam tih loh rual a ni lo. Valverde an ban hian La Liga-ah hma an la hruai a, Champions League, Copa del Rey leh Spanish Super Cup-ah te beisei an la nei vek. 
An club kalphung hrechianga an ngaih Quique Setién chu coach ni turin an lalut a, mahse, eng nomawi mah chawi loin season an khar. Chu chauh a ni lo - Champions League quarterfinal-ah Bayern Munich chuan 8-2 ngawtin an sawp!
Barca-in Setién an ban zui a, an club legend Ronald Koeman an lalut a, Catalan club-in an kawng bo tawh chu hmuh let an inbeisei a, Dutch coach hoin indinthar an tum. 
Tidamtu Xavi
Koeman-a'n thutlukna pa tak tak a siam nghal a, a thutlukna siam langsar tak chu Barca striker chhuanvawr Luis Suarez a chhuahtir chu a ni - mahse, Dutch coach aiin Suarez a che fuh zawk. 
Uruguayan striker hian Atletico Madrid zawmin, league-ah goal 21 a khung a, La Liga a champion pui. Barca erawh Copa del Rey an champion hram a, Champions League round of 16-ah Paris Saint-Germain an ngam lo bawk. 
Barca-in hliam dam lo chungin Koeman an ring tlang a, mahse, October 28 a thlen meuh chuan an dawhtheihnain a tlin tawh lo. Koeman an ban a, an club legend Xavi chu thlemin, Nou Camp-ah an hruai let thei. 
Xavi-a'n Barca tuam dam hna rang takin a thawk nghal a, mahse, club president hlui Josep Maria Bartomeu-a'n lei ba tam tak a hnutchhiah avangin an beisei ang erawh chuan chak takin a thawh theih loh. 
An dam ta
Xavi-a'n season ṭantir aṭanga Barca a enkawl hmasak ber turah fimkhur takin transfer bazar a thlir a, an sum neih dan a hriat tel avangin free transfer-a an lakluh theih tur thlengin a ruahman. 
Spanish coach hian, loan-a an hawh a kirtir tiamin player 15 ngawt a chhuahtir a, euro maktaduai 44 vel a lalut - free transfer-in AC Milan midfielder Franck Kessié, Chelsea defender Andreas Christensen, Arsenal right back Héctor Bellerín leh Chelsea full back Marcos Alonso te chu a lalut bawk. 
Anni bakah hian Bayern Munich aṭanga Robert Lewandowski lalutin, Raphinha (Leeds United) leh Jules Koundé (Sevilla) te a lei thei bawk a, anni bakah hian rawlthar duhawm Pedri, Gavi leh Alejandro Balde te a chher hriam a, Barca-in hmanrua an ngat sawt hle. 
Catalan club hian an duh angin European football-ah hlawhtlinna chang nghal lo mah se, La Liga-a champion nomawi an chawi leh ringawt pawh hahdamna tham a tling a, Barca mutthlu mek kha an tho ṭan leh ta e.
<figure style="max-width: 416px;"><img src="https://api.vanglaini.org/image/image-medium/UrRerEyKfWSgXTu9ikx4grd1vw4rkgtpaZou4or6.jpg" data-image="45331" width="416" height="1265" style="width: 416px; max-width: 416px; height: 1265px;"></figure>
<figure style="max-width: 356px;"><img src="https://api.vanglaini.org/image/image-medium/dAsne4Ee7WhdS5NbbOv0zN1BHZq09xh8VeDYld8c.jpg" data-image="45332" width="356" height="917" style="width: 356px; max-width: 356px; height: 917px;"></figure>