Lianzuala aia thiam an awm lo

Kumin zet chu - Lallianzuala Chhangte tan chuan Krismas ang char char a la ni rih! Mizo footballer hian Inrinni khan Football Players' Association of India (FPAI) Indian Player of the Year chawimawina a dawng a, Mizo zingah Jeje Lalpekhlua tih loha he award dawng thei hmasa ber a ni.

Lunglei tlangval Lianzuala tan tun season hi season ṭha bik tia chhal ngam a ni. Mumbai City forward hian Durand Cup hmanga season bul ṭanin, Golden Boot a dawng a, ISL-ah Hero of the League a ni a, Hero Tri-Nation Series-ah Player of the Tournament a ni a, tunah FPAI Indian Player of the Year atan thlan a ni leh ta.

FPAI Awards hi Gangtok, Sikkim-ah sem a ni a, Foreign Player of the Year atan Mumbai tana Lianzuala khelhpui Greg Stewart chu thlan a ni a, Coach of the Year-ah Mumbai boss Des Buckingham niin, Bengaluru forward ṭhangduang Sivasakthi Narayanan chu FPAI Young Player of the Year-ah thlan a ni.

Season duhawm bik

Lianzuala hian tun season inelna hrang hrangah Mumbai tan match 32 khelin goal 18 ngawt a khung a, assist vawi kua a nei thei. Season hman zawh takah khan goal 27 a thawk chhuak tihna a ni.

ISL-ah nomawi chawi zo ta lo mah se match 22-ah goal 10 khunga assist vawi ruk neiin, Sunil Chhetri tih loha Indian player zinga ISL Golden Ball dawng thei hmasa ber a ni. Season bul ṭanna Durand Cup-ah match sarih khela goal sarih khungin assist vawi thum a nei a, top scorer a ni.

Hero Super Cup-ah match thum khelin goal khat a khung a, season hman zawhah India tan Tri-Nation Series a khel zui a, Player of the Tournament atan thlan a ni bawk.

Award hlu bik

Lianzuala chuan, "ISL-ah Golden Ball ka dawn avangin beiseina chu a awm lo thei lo. I League leh ISL lama ka player puiten min thlan a nih avangin ka ngaihlu hle," tiin Vanglaini a hrilh - player 400 velin vote hi an thlak a ni.

India tan vawi 19 inlana goal li khungtu Lianzuala chuan sawi zawmin, "Hlawhtlinna ka lo chan ve ṭhinte hi Pathian malsawmna a ni tih ka hria a, Amah avang chauha hetiang dinhmun hi thleng thei ka ni tih hi min hriatsak ula ka ti takzet.

"Kawng thui tak zawh tur ala awm, ṭawngṭainaah min lo hre zel dawn nia," tiin Mizo mipui ṭawngṭaipuina a ngen a, vawiin hian Hero Intercontinental Cup khel tura inbuatsaih India squad chu Bhubaneswar, Odisha-ah a zawm nghal ang.

Mizo sulhnu

Gangtok-a award semnaah hian FPAI XI leh Sikkim Stars ten exhibition match khelin, FPAI XI hian 2-0 in hnehna an chang a, Lianzuala pawh he match-ah hian a inlan.

FPAI Award-ah hian Mizo hming a lo langsar fo tawh ṭhin. Kum 2016 khan Jeje chu Indian Player of the Year atan thlan a lo ni tawh a, 2011 khan Young Player of the Year-ah thlan a ni bawk. Lianzuala hian kum 2019 khan Young Player of the Year hi a lo dawng tawh a, hemi ṭum pawh hian Sikkim-ah tho award hi sem a ni.

Jerry Mawihmingthanga chuan 2018 & 2020 khan Young Player of the Year hi a dawng a, kum 2021 khan Lalengmawia Ralte chuan a dawng bawk. Kum 2017 khan Aizawl FC coach Khalid Jamil chu coach ṭha berah thlan a ni a, Mizo legend S. Malsawmtluanga leh Mizoram Football Association ten Special Award an lo dawng tawh bawk.