Lampard hoin Chelsea an chak ve ta; Premier League aṭangin an tla dawn lo!

Chelsea chuan an manager lailawk Frank Lampard hoin chak ni hmel an hmu ve ta - Inrinni zan inkhelah Blues hian Bournemouth chu 3-1 in an hneh a, season tharah Premier League an khel chhunzawm zel dawn.

Lampard an koh kir hnuah Blues hian league match pali an khelh hmasakah an tlawm vek, Champion an sawi ngam lo a, Champions League chu sawi loh European football hrim hrim an ngaihtuah ngam lo - tlak hlauhthawnawm zinga sawi tel theih an ni hial.

Mahse, tunah chuan Chelsea an chak leh ta a, match 34 aṭanga point 42 hmuin 11-naah an awm. Tla thei china awm Nottingham Forest tan Chelsea hi point lamah chuan nihrual theih an la ni, mahse an goal difference en chuan Lampard-a naute an chungnung dawn tih a chiang tawh.

Blues an chak

Vitality Stadium-a inkhelah Lampard-a'n Arsenal laka mualpho Pierre-Emerick Aubameyang a ring nawn lo, Gabonese striker hi squad-ah telh a ni lo - tlarhma laiah Kai Havertz dah niin Mykhailo Mudryk leh Noni Madueke ten an thlawp.

Beiseina an nei a, mahse goal khung turin beisei an nei sang lo. Minute kuanah lekah Conor Gallagher-a tauh luh hmangin hma an hruai, an hlim lai erawh a rei hman lo, minute 21-na lekah Matias Vina chuan Bournemouth ten a sut ve lehnghal.

Team pahnih an inhnehtawk mai dawn niin a lang hman, mahse hun tawp hma minute 10 chauh awm tawhah Benoit Badiashile leh Joao Felix te chuan Blues tan goal khung lehin khualmualah point thum hlu tak an hlawh chhuak.

Player an nei

Sum tam tak sengin Chelsea-in player an leikhawm a, an ṭhat dan takin an la khel chhuak lo tih erawh a chiang. Auba chauh ni loin Raheem Sterling bakah player dang pathum Gunners hmachhawn tute chu dah chhuah an ni.

Lampard chuan, "Player ṭhenkhat chuan hun remchang an neih an chhawr ṭangkai. Chelsea a nih chuan khel phak tura inel a ngai, tumah nghet leh chiangsa an awm bik lo, theihtawp kan chhuah tlan vek a ngai," tiin thawhrim a ngaih thu a sawi chhuak.

Duhthusam vekin khel lo mah se Benoit Badiashile, Trevoh Chalobah, Mykhailo Mudryk leh Kai Havertz te an khel ṭha pangngai viau a, season hmawr bawkna duhawm tak an neih theih nan mawhphurhna an nei zui ang.

Cherries him rih lo

Nikum August thla khan Scott Parker thlakin Gary O'Neil chuan Bournemouth a enkawl ṭan a, tluk leh din fawmin season an hmang chhio ve zel, an mikhual Chelsea lakah khan chak ni se la chuan EPL khel zel turin an him chiah ang.

Mahse, Cherries an chak lo a, him tur chuan an nghah leh rih a ngai dawn. Gary O'Neil-a naute hian Crystal Palace, Manchester United leh Bournemouth te an la hmachhawn leh ang, point thum a hmuh belh a nih chuan midang result ngaihchan ngai loin an him dawn.

Bournemouth manager O'Neil chuan, "Kan inkhel tawk hleah ka ngai, kan danglamna chu goal hmaah khan a ni. Kan hriam tawk lo a, chu bakah Blues keeper Kepa Arrizabalaga kha a khel ṭha hle bawk," a ti a, an match lehpekah point hmuh ngei a beisei.