Newcastle-in goal ruk an khung - a tuartu Spurs!

Champion inum tluk zeta ngaihnawm chu Champions League khelh phak tuma team inum a ni - Pathianni zan khan Champions League khelh tum ve ve Newcastle United leh Tottenham Hotspur an intawng a, Magpies hian an mikhual hi 6-1 in an lo sawp!

St James' Park-ah mualneitu team tan Jacob Murphy leh Alexander Isak te chuan goal hnih ve ve an khung a, Joelinton leh Callum Wilson te chuan goal khat ve ve an khung bawk.

Spurs tan goal khung ṭhang Harry Kane chuan goal khat khung ve mah se awmzia a nei phak lo a, mualpho zualpui khuhna chauh a ni - an elpui lakah dawl zawrin an zawr.

Tottenham hi table-ah pangana la nih chhunzawm mah se point ruk zetin palina Manchester United an phak lo a, season thara Champions League khel turin an dinhmun a him ta lo hle.

A chiang hma

Newcastle khelmualah football fan-ten inkhel hmuhnawm hmuh an beisei a, an beisei aia hmain goal a lut hma a, an beisei aiin result a chiang hma bawk - Magpies-in an mikhual lakah zahngaihna an lantir lo.

St James' Park-ah mipui thawm a ṭha a, a chhanglettu chu goal a ni - minute hnihna lekah Joelinton chuan ṭha zeta ball lalutin, goal-ah a shot a, Hugo Lloris chuan lo dang ve bawk mah se a per lehlam chu Murphu ke bulah tak tlain, goal-a chantir loh mawi lo khawpa chance duhawm a ni.

Spurs an hawihai a, mahse, hei hi bul ṭanna chauh a la ni! Goal an khung aṭangin minute li a liam hman awrh a, Fabian Schar chuan ṭha zetin Spurs lamah ball a thlawh lut - Brazilian midfielder Joelinton chuan lo chang fuhin, goalkeeper Lloris nen lama bumin an goal hnihna a khung.

Tottenham an insiamrem hman meuh lo a, thawk an la hman lo a ni ber. Minute kuanaah Murphy bawk kan hmu nawn. Schar chuan Son Heung-min ball ken lai chhuhsakin Murphy tan a pe a, English winger hian penalty box pawn aṭangin mawi zetin goal-ah a chantir - goal khungtu lawmna hmelah goal ropui bik a nihzia a lang a, Lloris a che eih lo!

A hmingah chuan Isak!

Newcastle-in minute kua chhungin goal thum an khung a, Spurs lamin an chhanlet theih mai loh avangin chak tur a chiang hma, tia sawi ngam a ni. Mahse, hei hi a tawpna a la ni lo cheu a, Magpies an phur laklawh a ni ber.

Minute 19-na a ni a, Alexander Isak hun a inher chhuak. Swedish striker hian Joe Willock-a ball pek ṭha zet chu harsatna nei loin goal-ah a chantir a, minute thum hnu lawkah angle chep zet kar aṭangin a goal hnihna a khung leh bawk.

Newcastle hian minute 21 chhungin goal li an khung hman a, 4-0 ni chungin chawlhlawk an hmang. Second half ṭan aṭanga minute lina lekah Kane kan hmu ve zawk a, English striker hian a team tan beiseina siam turin si phurh a sut ṭhen - goal ṭha bik a ni.

Mahse, Spurs-in goal an chhuah hnem hman hret a, an tho leh tawh lo - Isak-a'n hattrick siamna remchang a neih a chhawr loh hnuah Wilson a inlar a, bench aṭanga luhtir striker hian an goal rukna a khung.

Mualphona tawpkhawk

Spurs-in goal ruk ngawt Magpies lakah an chhuah a, Antonio Conte-a'n a chhuah hmaa na taka London club a sawiselna kha fan-te thinlungah a thar uar uar ang - he team hi coach ropui Jose Mourinho leh Conte te meuh pawhin an beidawn pui kha an ni tlat.

A rei tawlh tawlh a, Spurs-in season tawp thlenga club enkawl tura Cristian Stellini an ring chu a mak tawlh tawlh - game khelh dan phungin awmzia a nei lo a, khelmualah tum mumal awm loin an lut tawp em ni chu aw, tih mai tur a ni!

Conte khan, "Mahni hmasial takin an khel," tiin a player-te a lo sawisel tawh a, club neitu Daniel Levy chu, "Kum 20 chhung he club-ah hian a awm tawh a, eng nomawi mah an chawi lo," tiin a sawisel bawk - Spurs siam ṭha turin a neitu lam aṭanga bul ṭan a ngai niin a lang.

Magpies laka khel ṭha awmchhun chu Kane a ni - English striker goal khung thei bik hian a career-ah nomawi a la chawi lo a, nipui transfer-ah chuan Spurs chhuahsan hi a châk tawh khawp ang.

---------------------------------------

Khatiang ang game pawimawh khel tura kan inbuatsaihna kha a ṭha tawk lo a ni. Squad ṭha tak kan nei a, mahse, vawiinah kha chuan team ṭha tak kan nihzia tumahin an pholang thei lo - kan khelh dana thutlukna siamtu chu keimah ka ni a, hliam kan neih nual avangin khelh dan pawh kan thlak. Ka mawhphurhna chu ka la a, mahse, ka tisual a ni.

Kan tihdan kan thlak kha chuan goal kan khung a, theihtawp kan chhuah bawk. A tir lam minute 25 kan tichhe em em mai kha ka hrethiam lo.

- Cristian Stellini, Spurs manager

Khatiang ang taka bul ṭan theih kha a harsa ṭhin a, a bik takin vawiin ang game pawimawh angah chuan a harsa lehzual. Jacob Murphy pawhin team tana a ṭangkaizia a pholang a, eng position-ah pawh khel thei niin, goal pawh a khung ṭha hle. Team thawhhona rah a ni a, ka player-te chungah ka lawm takzet a ni.

Champions League kan khelh dawn leh dawn loh hi ka sawi theih a ni lo - vawiinah pawh team ṭha tak pahnih inkhel kan hmu. Mahse, match tam tak khelh tur a la awm a, point hlawhchhuah tur a la awm nual a ni.

- Eddie Howe, Newcastle United manager