Tuchel enkawl Bayern an che fuh thei lo

Bayern Munich-in Thomas Tuchel an lakluh hnuah chak hmel hmuh an harsat a, Inrinni zan khan Allianz Arena-ah Hoffenheim nen 1-1 in an inhnehtawk. Bavarians vanneihna erawh an elpui ber Borussia Dortmund pawh an chak bik lo, Bundesliga hmahruaitu an ni chhunzawm zel.

Tuchel leh buaina

Bayern club hotu Oliver Kahn leh Hasan Salihamidzic ten club ṭhatna turah ngaiin treble champion theih laiin manager Julian Nagelsmann banin Thomas Tuchel an lalut.

Tuchel an lakluh hnuah Bayern-in Borussia Dortmund sawp nghal mah se reuslt ṭhain a chhunzawm lo. Freiburg an hneh loh avangin DFB Pokal aṭangin an tla a, Manchester City laka goal an chhuah tam avangin UCL aṭanga tla thei an ni.

Bundesliga-ah pawh Bayern hi an champion chiang han tih ngam tur an ni lo - Inrinni zan khan Hoffenheim nen 1-1 in an inhnehtawk. Tuchel awm hnuah khelmualah result ṭha an nei lo a, an player pawimawh Sadio Mane leh Leroy Sane te an intibuai a, German manager hian nomawi ni loin buaina a keng tel zawk niin a lang.

A harsa dawn

Bayern-in goal khungtu an mamawh a, tlarhma lama player-ten goal khung an harsat. Minute 17-naah defender Benjamin Pavard-a'n goal hmahruai a khung a, Bayern an phur hle.

Mualneitu hian inkhel thunun mah se goal dang an khung thei lo a, Serge Gnabry-a'n chance ṭha a hlah hnem. Hoffenheim forward Andrej Kramaric-a'n minute 71-naah freekick aṭangin a khung a, Bayern keeper Yann Sommer a ti ṭha tawk lo.

Pavard-a'n hmahruaina goal a khung lehnghalah a inngai a, mahse VAR hman hnuah pawm a ni lo. Bayern-in na takin an nawr a, injury time-ah Gnabry-a'n chance ṭha bik a hlah a, Hoffenheim lakah point hnih an hloh.

Tuchel chuan, "Chak turin kan theihna zawng zawng kan lantir tur a ni a, kan lantir lo. City lakah hian chance nei lo kan ni lo a, mahse tuna kan result avang hian a awlsam phah lo," tiin a sawi.

German manager hi a player-te khelh danah a lawm lo a, Man City nen UCL quarterfinal second leg an khelh turah 'comeback' harsat tur thu a sawi nghal.

Hun ṭha bawhpelh

Bayern-in point hnih an hloh a, Dortmund hian Sebastian Haller leh Donyell Malen te hmangin first half-ah hma hruai mah se Tanguy Coulibaly leh Josha Vagnoman hmangin hun tawp dawn hnaiah VfB Stuggart-in siphurh an sut zo. Minute 84-naah 1-1 a ni.

Heta hian 'drama' a la tawp lo. Inury time minute hnihnaah Gio Reyna-a'n Dortmund tan a khung a, chakna goal ni tura ngaih a ni. Mahse, injury time minute sarihnaah Dortmund substitute Soumaila Coulibaly-a'n box chhungah ball a pet ṭhelh a, Silas Katompa Mvumpa-a'n Stuttgart tan siphurh sutna goal a khung.

Dortmund hian point hnih an hloh satliah lo a, player 10-a hun tam zawka khel lakah point khat chauh an hlawh chhuak. Stuttgart defender Konstantinos Mavropanos chu minute 39-naah hnawhchhuah a ni a, Dortmund hi 2-0 in hma an hruai tawh chungin an goal neih an hum thei lo a ni.

Dortmund hian match 28 aṭangin point 57 a hmu a, Bayern-in khelh zat inangah point 59 an hlawh chhuak. Match ruk khelh tur a la awm a, champion tur a la chiang lo hle.