Match hmasaah Golden State chak lo

A thiam zual pariat inelna - NBA playoff chu Inrinni khan khelh ṭan niin, nimin zing inkhelah champion lai Golden State Warriors chu Sacramento Kings lakah 126-123 in an chak lo.

April 18, Thawhlehni zing dar 7:30 hian game 2 khelh a ni dawn. Best of seven series hmanga chak zawk zawn tur a ni a, tlang tur chuan a tlem berah vawi li tal chak a ngai - Warriors tan pawh kawng a la inhawng zau.

Golden 1 Center-a inkhelah De'Aaron Fox-a'n point 38 a nei, a point neih zinga 28 zet hi quarter hnuhnung bera a neih a ni, hun pawimawh laiah tha a thawh hlawk takzet. Bench aṭanga lut Malik Monk pawhin point 32 a nei bawk.

Kings hian kum 17 hnua a vawi khat nan NBA playoff an khel ve leh a ni a, an phur takzet. Golden State Warriors tan Stephen Curry chuan point 30 nei mah se a team chakpui nan a tawk zo lo, game 2-ah thapui an thawh ang.

NBA playoff inkhel dangah - Philadelphia 76ers, Boston Celtics leh New York Knicks te chuan an match hmasa berah hnehna an chang ṭheuh a, round sang zawk lut turin an dinhmun an siamṭha.

Joel Embiid (26 points) leh James Harden (23) te chetṭhat vangin Philadelphia chuan Brooklyn Nets 121-101 in an hneh; Philadelphia 76ers hian 3-points vawi 21 ngawt an ti lut a, playoff china an neih hnem ber ṭum a ni.

Boston Celtics pawhin Atlanta Hawks 112-99 in an hneh a, an chak theih nan kut zungṭang hliam dam hlim Jaylen Brown chuan point 29 a nei, a kut zungṭang an chilhna an phelh aṭanga ni hnih hnuah a khel ṭha nghal hle.

Inkhel dangah New York Knicks chuan Cleveland Cavaliers lakah 101-97 in game 1 an la ve bawk.