Napoli leh Milan chak zo lo

Serie A hmahruaitu Napoli leh champion lai AC Milan te chuan kar tawp inkhelah duhthusam result an nei lo ve ve, team pahnih hi Chanpions League lamah an inhmachhawn chhunzawm leh dawn a ni.

Napoli coach Luciano Spalletti-a'n a player ṭha ṭhenkhat a hahchawlhtir, an mikhual Hellas Verona nen 0-0 in an inhnehtawk. Tlak hlau, tla thei china la awm mek Verona tan hmahruaitu lak aṭanga point khat lek hlawhchhuah pawh hi a lawmawm khawp ang.

Naples club tan Matteo Politano chuan goal a khung, mahse Napoli player dangin Verona goalkeeper Lorenzo Montipo an lo tih buai avangin offside a pawmsak an ni a, goal an hnawlsak.

Chak zo lo mah se Napoli tan Victor Osimhen chu bench aṭangin a rawn lut thei tawh. Nigeria international hian Champions League quarterfinal second leg-ah Milan a hmachhawn thei ngei dawn, chanchin lawmawm a ni ang.

Inkhel dangah AC Milan chuan second 32-na lekah goal an chhuah a, chawlhlawl hma minute nga la awmah midfielder Tommaso Pobega chuan siphurh sutin an mikhualna ramah Bologna nen 1-1 in an inhnehtawk.

Milan coach Stefano Pioli pawhin UCL a thlir ve tho a, a player ṭha a hawhchawlhtir. April 18, Thawhlehni zana Napoli nen UCL semifinal lut tur zawk an chingfel dawn - Milan hian 1-0 in hma an hruai mek a ni.

An chunga awmte pahnih chak zawh loh zanah Inter Milan an che fuh thei bik chuang lo. San Siro-a inkhelah Inter hian an mikhual Monza chu 1-0 in an ngam lo, anni pawh hian Serie A aiin Champions League an ngaipawimawh rih zawk.