MBA Player of the Season-ah Saitluangpuia & Abigail

Mizoram Badminton Association (MBA) chuan April 14 khan kum 2022-2023 chhunga player che ṭhate chawimawina hun a nei a, MBA Player of the Season (mipa) ah Saitluangpuia Sailo, Ramhlun Venglai, Bawngkawn Badminton Club player thlan a ni - hmeichhe lamah Saron Veng tleirawl Abigail Lalṭhazuali, Saron BC tana khel mek chuan he chawimawina hi a dawng bawk.

Pullela Gopichand Badminton Academy-a awm mek Saia hi MBA Official Championship leh MBA Finals champion kawp thei a ni a, Abigail pawh hi inelna lian pahnihah hian a champion ve bawk - award pahnih hi Sangtei Buk ten an sponsor a ni.

Player of the season (Junior boys) atan H. Lalṭhazuala, Ralte Villa BC player chu thlan a ni a, Chanmari West naupang hi Mizo zinga junior category bika national level-a singles champion ni thei hmasa ber a ni. Hmeichhe lamah Serchhip shuttler Lalrempuii, Ralte Villa BC tana khel mek chuan MBA Award hi a dawng ve bawk.

National level (junior leh senior)-a quarter final thleng phakte tana buatsaih EcoSave Mizoram cash incentive award chu Sainunmawia Sailo (boys' singles), Ramhlun Venglai, H. Lalṭhazuala (boys 'singles), Chanmari West, Malsawmhlua (boys' doubles), Serchhip leh Vanlalpekhlua (boys' doubles), Serchhip te hnenah hlan a ni bawk - he award hian singles inelna huangah mi pakhat tan Rs. 50,000 zel a keng tel a, doubles category-ah mi pakhat tan Rs. 25,000/- zel pek an ni.

Mizoram Pollution Control Board Conference Hall-a hun hmanah hian MBA Players Support pekchhuah a ni bawk a, hei hi national ranking tournament-a main draw lutte leh senior category-a mahni sum senga khelte hnenah pawisa faiin pek ṭhin a ni a, main draw an khelh phak apiangin lawmman hi a hrana pek zel an ni.

Players support hi Malsawmhlua, Vanlalpekhlua Sailo leh Lalrempuii te chu vawi hnih ṭheuh pek niin, Sainunmawia, Lalnuntluanga, Lalrinhlui, C. Lalramsanga, Abigail Lalṭhazuali, C. Lalramzauva, Joseph Lalhruaitluanga, Joseph VL Ringngheta leh Vanlalhriatrenga ten vawi khat ṭheuh an dawng bawk.

He hunah hian Lalrindika Ralte, MLA chu khuallian niin, MBA Charity khuhhawnna neih a ni bawk - hei hi Mizoram chhunga badminton player harsate tana duan niin, sum leh pai leh badminton khelhna hmanrua mipuiten an thawhkhawm theihna tur leh chumi hmanga ṭanpuina player harsa zawkten an lo dawn theih nana din a ni. Charity hi sum leh pai bakah thawmhnaw hman hluite thlenga thawh theih a ni.