NorthEast United-in Mumbai hneh

Hero Super Cup-ah NorthEast United chuan 2-1 in Mumbai City an hneh a, ISL league winner Mumbai hi Indian hlanga khel an nih avangin result mak tia sawi tur erawh a ni lo.

Highlander tan Wilmar Jordan chuan goal hnih khungin, Mumbai tana Lalengmawia Ralte (Apuia) goal khungin awmzia a nei phak lo - Mumbai tan hian Lallianzuala Chhangte pawhin bul a ṭan a, mahse, a team a chhan thei ta bik lo a ni.

NE United tan Joe Zoherliana'n bul a ṭan a, Rochharzela leh Laldanmawia Ralte chu bench aṭanga luhtir an ni thung. Inrinni zan inkhel dangah Churchill Brothers leh Chennaiyin chu 0-0 in an inhnehtawk.

Zirtawpni zan khan FC Goa chuan 1-0 in Gokulam Kerala an hneh a, Iker Guarrotxena chuan minute 90-naah goal awmchhun a khung. Zirtawpni zan inkhel hnuhnung zawkah Jamshedpur chuan 3-0 in ATK Mohun Bagan an sawp thung.

Kolkata club tan Boris Singh chuan goal hnih khungin, Harrison Sawyer chuan goal khat a khung bawk - Men of Steel tan Ricky Lallawmawma leh Laldinliana Renthlei te chuan inkhel bul an ṭan a ni.