A zawna vawi thum chak lo Chelsea

An duh loha an ban hnu Frank Lampard an lakir a, awmzia a awm chuang lo. Lampard an rawih leh hnuah Chelsea chuan match thum an khel a, an chak lo fai vek!

Inrinni zan Premier League inkhelah Chelsea hian Brighton 2-1 in an ngam lo. London club hi an chak lo a ni satliah lo, mikhual team lamin Stanford Bridge-ah duh tawkin inkhel an thunun thei - Blues fans tan a na zual ang.

A khel ṭha lo zawk Chelsea lamin Conor Gallagher hmangin vannei takin goal an khung hmasa, mahse Brighton tan substitute Danny Welbeck-a'n si phurh a sut a, rawlthar Julio Enciso chuan mawi zetin chakna goal a khung bawk.

Lampard chuan, "Khatiang kha Chelsea khelh dan a ni ngai lo, kei leh ka player-ten a rang thei ang bera kan siam ṭhat nghal a ngai. Tun ṭum kan match ang kha chu hmuh nawn ka duh tawh lo," a ti.

Chelsea hian Thawhlehni zanah Champions League khel turin Real Madrid an mikhual zui dawn. Quarterfinal first leg-ah Blues hi 2-0 in an chak lo, semifinal lut tur chuan Spanish club lakah goal khung ngei ngei an mamawh.

Premier League table-ah 11-na an ni mek a, an dinhmun ngaia season an kar a nih chuan 1995-96 hnua season an hman chhiat ber ṭum a ni hial ang. Brighton erawhin point 49 hmuin pasarihna dinhmun an luah thung.