Reds squad-ah Diaz awm dawn

Liverpool chuan zanin dar 12:30 hian Premier League match khel turin Leeds United an lenchilh dawn a, Reds manager Jurgen Klopp chuan rei tak hliam vanga chawl tawh Luis Diaz chu squad-a a awm tur thu a sawi.

Klopp hian kar hmasa khan Leeds nena an inkhelh tur chungchangah media a hmachhawn a, German coach chuan, "Training-naah chuan 100% in a inpeih tawh - engkim a zia tawh a, tuna kan tih tur chu lo lawm let hi a ni. Thil dang a thleng a nih loh chuan squad-ah a awm ang a, chu ta ṭang chuan kal zel dan tur chu kan thlir ang," a ti.

Diaz hi October aṭang khan hliam vangin a chawl tawh a, zaninah a inlan thei a nih chuan Reds tan thu lawmawm a ni ang. Hetihlai hian hliam vanga buai ve reng Thiago Alcantara chu inkhel bul ṭan thei zingah a tel a, goalkeeper Alisson Becker leh defender Ibrahima Konate te chuan kar hmasa khan vawi hnih ngawt training zawm thei lo mah se zaninah erawh inlan thei tura beisei an ni.

Liverpool hi Premier League table-ah pariatna an ni mek a, palina Manchester United chu point 12 ngawtin an thlau mek a, nizan khan United hi inlanin, an chak a nih chuan Reds hian top four an hlatna hi point 15 a ni tawh ang.