PSG tana league goal khung hnem ber Mbappe

Kylian Mbappe chu Paris Saint-Germain tana Ligue 1 goal khung hnem ber a ni der mai. France international hian Paris club tan league match 169 aṭangin goal 139 a khung a, record hmasa chelhtu Edinson Cavani a khum.

Inrinni zan khan Ligue 1 club ṭha pahnih inkhelah PSG chuan Lens 3-1 in an hneh. Mikhual Lens midfielder Salis Abdul Samed chu minute 19-naah hnawhchhuah a ni a, mualneitu leh team ṭha zawk PSG tan hna a harsa tawh lo.

Mbappe-a'n goal hmahruai a khung bakah Vitinha leh Lionel Messi ten an khung belh, chawlhlawk an hman meuh chuan chak tur a chiang tawh. Second half-ah Lens tan Przemyslaw Frankowski-a'n penalty khung ve mah se awmzia a nei tawh lo.

PSG coach Christophe Galtier chuan, "Kan tana inkhel pawimawh leh chak ngei ngei ngaihna a awm a nih chuan tuna mi hi a ni ang. Parc des Princes-a kan match hnuhnung pahnihah kan chak lo, tunah erawh kan nihna tak kan lantir leh thei ta.

"Goal thum kan neih hnuah kha chuan nuamsa takin kan khel thei tawh a, kan phu ang ngeiin point thum kan hlawh chhuak," a ti. PSG hian an duh ber Champions League la thei lo mah se Ligue 1 erawh an chawi leh ngei ang.