Champion tum City an chak nuamsa

Arsenal ṭantute mawng a za ṭan - an hnuai chiaha awm Manchester City chuan Inrinni zan khan Leicester City chu 3-1 in an hneh a, Pep Guardiola team ten champion an beiseina an chhi nung ve zel.

City tan Erling Haaland chuan dan pangngaiin goal a khung leh ta a, goal hnih a khung - John Stones chuan goal khat a belhchhah ve bawk a, goal thum hi first half minute 25 chhunga an khung a ni.

Leicester tan Kelechi Iheanacho chuan goal khat khung ve mah se, a team beiseina chhi nung turin a tawk zo lo a, Brendan Rodgers bantu Leicester chu relegate hlauhthawnawmah an awm chhunzawm zel.

A harsa lo

City-in goal khung turin harsatna an tawk lo. Minute ngana lekah tun hnaia midfield anga chhawr ṭhin Stones chuan ball pet thiam a ni tih a pholang a, Rodri-a ball tauh chu lei a tlak hmain mawi zetin a chhuih lut - Foxes-in corner aṭanga ball kal an petchhuah loh an tuar.

Minute 12-na a ni a, Foxes vanduai a kaltluang. Tun hnaia khel ṭha thei em em Jack Grealish-a ball cross chuan defensive midfielder Wilfred Ndidi kut a per a, referee-in video assistant referee a rawn hnuah penalty spot a kawk.

City tan Haaland chuan penalty hi harsatna awm loin goal-ah a chantir a, minute 25-na lekah Kevin de Bruyne siamsak chu mawi taka tlan lut chungin goal-ah a chantir bawk - striker goal ni awm renga mawi a ni.

A har a ni!

Foxes tan Iheanacho chuan minute 75-naah hnai set sawt aṭangin si phurh a sut ṭhen a, mahse, Ederson chuan Foxes comeback beiseina chu James Maddison-a chance neih dansak chungin a tihtawpsak.

Premier League champion hlui Foxes hian Rodgers an ban hnuah an inhamtan theih hram beiseiin Dean Smith an lalut a, mahse, English coach tan danglamna thlen nghal a harsa tih a lang a, a match hmasa bera City kher a hmachhawn chu a vanduaina belhchhahtu a ni.

Foxes hi table-ah 19-na an ni mek a, mawngphah luahtu Southampton nen match 31 ve ve khel tawhin, point hnih chauhin an sang zawk - season thara Premier League khel lo thei dinhmunah an ding mek.

A hming Haaland

City tan Haaland-a goal khung hi chanchinthar a tling tawh lo - a thleng ngun tlat! Norwegian striker hian league match 28 aṭangin goal 32 a khung tling ta a, inelna hrang hrangah match 40 khelin goal 47 a khung tawh.

Premier League season khata match 38 khelh a nih hnua goal khung hnem ber record chelhtu chu Mohamed Salah a ni a, Liverpool legend hian 2017-18 season-ah khan match 36 khelin goal 32 a khung - Haaland hian a nih rual ta.

City-in match 30 an khel tawh a, match riat an la bak - thil mak danglam a thleng a nih loh chuan Borussia Dortmund striker hlui hian Salah record lo siam tawh hi a khum ngei a rinawm.

Hmabak hautak

City hi an vanneih zan ni se, goal tam zawk khung thei tur an ni. Mahse, Foxes goalkeeper Daniel Iversen chuan Riyad Mahrez khung ngei tura lang chu ṭha takin a dansak a, Pep-a'n match hmabak ngaihtuah chungin substitution panga ngawt a siam bawk.

Haaland chu minute 45-naah lakchhuah niin, Stones (45'), Rodri (53'), De Bruyne (62') leh Grealish (74')te chu a la chhuak bawk - April 19 zanah Bayern Munich nen Champions League quarterfinal second leg an khel dawn a, khualmualah an leng ang.

City hian first leg-ah 3-0 in hnehna an chang tawh. April 22 zanah Sheffield United nen FA Cup semifinal an khel zui ang a, April 28 zanah league champion tura an elpui Arsenal nen an intawng ang - hei hi Pep-a ṭawngkam takin, "Premier League final," tih ngam a ni.