Vawiin aṭangin Khawzawlah Oriflame MFA Cup ṭan dawn

Mizoram Football Association hnuaia district club ṭhate inelna, Oriflame 23rd MFA Cup chu vawiin aṭangin Khawzawlah khelh ṭan a ni dawn a, April 29, Inrinni thleng a awh ang. Inelnaah hian district pakua - Aizawl, Champhai, Hnahthial, Khawzawl, Kolasib, Lawngtlai, Mamit, Saitual leh Serchhip aiawh club-te an inlan dâwn a ni.

He inelna hi Oriflame India nen thawk duna kalpui a ni dâwn a, Frederic Widell, VP, Head of South Asia & MD India, Oriflame chuan, "Infiamna hian mipuite inpumkhatna turin thiltihtheihna danglam tak a nei a, thuchah pawimawh tak tak a thlen thei a, a bik takin entu naupang zawkte nena inzawmna danglam tak a thlen thei a ni.

"Mizoram Football Association(MFA) nena kan thawhdunna kan puang thei hi kan chhuang a, kan phur hle bawk.

"He thawhhona hmang hian taksa leh rilru hriselna tihhmasawn leh infrastructure duh khawp awm lo chunga mitinin football an khelh theihna tura state sorkar thlawp a, football ngainatu ṭhalaiten eizawnna an neih theihna tur kawng siamsak kan duh.

"Chuvangin, MFA leh Mizoram state puih a, infiamna hmanga nun hrisel zawk chawi san kan beisei a ni," tiin duhsakna a hlan a ni.

Oriflame 23rd MFA Cup hi April 15, Inrinni zan khan Zaingen Branch YMA Hall-ah kickoff a ni a, Khawzawl district bawrhsap K. Lalrohlua chuan a hawng. Tun ṭum inelnaah hian Lunglei leh Siaha DFA aiawh an tel thei lo a, district dang zawngin aiawh an tir thei a ni.