LBS Suzuki 4th Inter Branch YMA TT Tournament a ṭiak ta
Central YMA leh Mizoram Table Tennis Association (MTTA) buatsaih LBS Suzuki 4th Inter Branch YMA Table Tennis Tournament 2023 chu Zirtawpni zan khan Hawla Indoor Stadium, Republic Vengthlangah a hmawr bawkna neih a ni a, TT player-ten final hmuhnawm bik an chhawp chhuah niin zan dar 1:30-ah final hi khelh zawh a ni chauh!
Mipa inelnaah Mission Veng YMA-in inelna an thunun. Team inelnaah Mission Veng YMA-in Mission Vengthlang chu 3-2 in final-ah an hneh hram a, singles-ah Mission Veng YMA tlangval pahnih Jeho Himnakulhpuingheta leh Alberto LR Ruata te inkhelin Jeho-a a vannei ta zawk.
Hmeichhe inelnaah Lalthansangi Sailo (Tebawihi) a langsar hle. Armed Veng nula hian singles-ah Lunglei Bazar Veng nula Vanlalnghaki a hneh a, team inelnaah Lalbiaknii ṭanpuiin Mission Vengthlang 3-1 in an hneh a, hmeichhe team inelnaah Armed Veng a champion pui.
Jeho-a Show
Mipa singles-ah Mizoram State TT C'ship rematch hmuh tur a awm a, Jeho-a'n a thiam thil pho chuakin vir chungin a khingpui Alberto hlap ṭum thum ngawt a la a, mipui lawm a hlawh hle.
Mizo TT player zinga theihna sang ber Jeho-a'n rinlawk angin singles-ah hnehna a chang a, chutihrualin Alberto-a'n match point a neih hman avangin a chak awlsam lo tih erawh a chiang. Jeho chuan, "Hetianga entu tamah hian Mizoram chhungah ka la inkhel lo," tiin CYMA Inter Branch TT inelna chu a fak hle.
Armed Veng timawitu Teboihi
Hmeichhe inelnaah Armed Veng nula Tebawihi khing phak an awm lo a, singles-ah harsatna nei loin Lunglei Bazar Veng aiawh Vanlalnghaki a hneh. Kum 2011-a Inter Branch TT inelna neih hnuhnun berah khan Tebawihi hi sub junior player lek a la ni a, hemi ṭum hian Mizoram no. 1 ni reng ṭhin Lalrinmawii a hneh loh avangin hmeichhe team inelna final-ah Upper Republic an hneh lo.
Tunah erawh Tebawihi a puitling tawh a, kum 10 chuang Mizoram no. 1 ni tawhin team inelnaah pawh Mission Veng tleirawl Malsawmtluangi leh Jenny Liansangpuii te harsatna nei loin a hneh. A kawppui Mabiaki hian kum 50 a hnaih tawh a, Mizo TT legend tia sawi theih Mabiaki hi Mizoram champion a nihin Tebawhi hi a la piang lo.
Chutichung chuan tun ṭum inelnaah veteran player Mabiaki leh Mizoram no. 1 Tebawhi te hi an inkawp rem a, Armed Veng an champion pui. Chutihrualin awlsam takin nomawi an chawi lo, doubles-ah chak lo se nomawi chan thei an ni. Asawmi leh Jenny ten dinhmun ṭhat zawk lai an nei a, mahse Armed Veng TT khel thiam pahnih hian awmze nei taka hun khawhralin hnehna an chang ta zawk.
Mission Veng hun
Mipa team final-ah Mission Veng derby hmuh a ni a, Mission Veng YMA chu chak tura rinkai ni mah se final-a MSVT rawlthar H. Lalruatsanga (Asangtea) rawn che ṭha chuan boruak a rawn ti sang hle.
Rinlawk ang ngeiin MSV leh MSVT no. 1 Alberto leh Asangtea ten hnehna an chang ve ve a, singles match thumnaah MSVT player Robert Pachuau-a'n Lalmalsawma a rawn hneh. MSVT tan hnehna chang turin Asangtea'n Alberto a hneh a ngai a, singles inelnaah Asangtea hi straight set-in a chak lo.
Asangtea'n set hmasa ber a la a, set hnihna hloh mah se set thumna a la leh bawk. MSVT rawlthar hi an veng mipuiin an ṭawiawm ringawt lo a, a nu leh pa bakah a pi leh puten an thlir a, zanlai dar 12:00 pelh tawhah pawh an la meng kar vek. A tawpah erawh tawnhriat ngah zawk Alberto a rawn tho chhuak a, 3-2 in hnehna a chang. Deciding match-ah C. Lalmuanpuia'n Zorema Pachuau 3-0 in a rawn hneh a, mipa inelnaah Mission Veng an champion.
MIPA TEAM : Mission Veng YMA
HMEICHHE TEAM : Armed Veng
Men's Singles : Jeho Himnakulhpuingheta, Mission Veng YMA
Womens' Singles: Lalthansangi Sailo (Tebawihi), Armed Veng