Bayern 'treble champion' beiseina a tawp

Bayern Munich-in Julian Nagelsmann thlakin Thomas Tuchel an lalut a, match hmasa berah Borussia Dortmund hnehin Bundesliga-ah pakhatna ni lehnghal mah se DFP-Pokal-ah erawh SC Freiburg hneh loin an tla.

Thawhlehni zan khan Allianz Arena-ah Bayern-in Freiburg an mikhual a, Dayot Upamecano hmangin minute 19-naah goal an khung hmasa zawk. Amaherawhchu Freiburg-in Nicolas Hofler hmanga minute riat hnua siphurh an sut hnuah injury time-ah Lucas Holer-a'n penalty aṭangin chakna goal a khung. Bayern ṭantute an hawi hai hle.

Chak duh Bayern

Thomas Tuchel-a'n player a thlan dan aṭangin chak a duh tih a lantir a, Aphonso Davies aia Joao Cancelo a luhtir tih loh chu Dortmund hnehtu aṭangin player dang thlak a nei lo.

Leroy Sane-a'n chance ṭha a nei nghal a, goal zawnah a pet lo. Bayern an phur a, Allianz Arena-ah Bavarians ṭantute an zuang suau suau a ni ber. An phurna belhchhah turin Bayern goal nawr a na a, Cancelo leh Sane inthlawp chu Freiburg tlarhnungin dan harsa an ti.

Minute 19-naah Bayern-in goal an khung ta a, Joshua Kimmich-a corner pet chu Upamecano-a'n a tauh lut. Tuchel-a hote tan semifinal a hnai tiin a sawi theih a, mahse beisei angin ngawtin thil a thleng zui lo.

Freiburg an fei

Freiburg hian FIFA World Cup-a Germany ngamtu Ritsu Doan an kawl a, Japanese winger hian Bayern lakah pawh a theihna a lantir. Bavarians tlarhnungin ball an clear lawk thei lo a, minute 27-naah ball per chhuak chu box pawn aṭangin Hofler-a'n kawh zetin a pet lut.

Mikhual team hi team nem zawk an nih miau avangin Bayern goal bawh a na a, Muller-a goal khung tur chu goalline aṭangin an pet chhuahsak. Benjamin Pavard ball tauh pawhin crossbar a per a, first half-a vannei lo Sane chu second half-ah pawh a la vannei chuang lo bawk.

Bench aṭanga rawn lut Serge Gnabry pawh goal hmaah a vannei chuang lo a, injury time-ah goal nawr natna tura dah luh Jamal Musiala chu a chesual. Hofler-a volley chu Musiala hian zuang chungin dan a tum a, a kut a phar avangin ball-in a kut a per.

Freiburg jersey number 9 Lucas Holer a rawn pen chhuak a, Germany tan pawha la inlan ngai lo kum 28 mi German striker hian keeper Yann Sommer chu bumin chakna goal a khung. Mipui ṭhutnaa awm club CEO Oliver Kahn chu a hmel aṭangin a thinur tih a chiang a, tih theih erawh a nei si lo.

Engtin zel?

Bayern-in Tuchel-a enkawlna hnuaiah pawh tlarhnung an la tiphui thei chuang lo a, Man City aṭanga an lakluh Joao Cancelo chu mamawh chhanna a ni lo. Matthijs de Ligt rintlak viau ṭhin mah se team angin an khel ṭha lo a, Champions League-a che ṭha turin tlarhnung thuam ṭhat ran a ṭul.

Tlarhma lamah Robert Lewandowksi a awm tawh lo a, Eric Maxim Choupo-Moting-a'n season hmang ṭha viau mah se mamawh hunah a rawn pen chhuak thei lo. Bayern hian kartawpah Freiburg hi league-ah an hmachhawn lehnghal dawn a, Allianz Arena ni loin Europa-Park Stadion a ni tawh ang.

DFB-Pokal-a Bayern pet chhuaktu Freiburg hian Bundesliga-ah pawh Tuchel-a hote harsatna an siam thei dawn. April 11, Thawhlehni zanah Bayern hian Etihad Stadium an tlawh zui dawn a, Thomas Tuchel-a hote hmabak hi a hautak dawn hle.

German Cup quarterfinal inkhel dangah Eintrancht Frankfurt chuan Randal Kolo Muani goal hnih hmangin Union Berlin an hneh. Nizan khan inkhel pahnih dang a awm bawk.