Scottish champion-ah Celtic an puang

Coronavirus vangin Scottish Premiership chu tihtawp a nih thu puan a ni ta a, hemi rual hian league tihtawp a nih laia hmahruaitu Celtic chu champion-ah puan an ni bawk. 

Celtic champion-a puan an nih lai hian Hearts erawh division hniam lama an tlak thlak tur thu puan a ni thung a, Hearts lungawi lo hian court lamah an kal tur thu an sawi zui. 

Champion-a puan tak Celtic CEO Peter Lawwell chuan, "He nomawi kan phuzia hi an hre vek a ni," a ti a, fan-te chu champion lawma pung­khawm lo turin a chah bawk. 

Scottish Professional Football League chuan Sco­ttish Premiership champion zawn nan hian table awm sa an ring ringawt lo a, league table-a an point neih sa aṭangin match khata an point hmuh zat kha an chawk rual a, average point nei sang ber chu champion-ah puan an ni. 

Celtic hi match khata 2.67 point hlawh chhuak ang an ni a, anmahni hnaih bertu Rangers chu match khata point 2.31 nei ang an ni thung. March 13-a league tihtawp a nih khan Celtic hian point 13-in anmahni hnaih bertu Rangers an tlan san a, Rangers hian match khatin an khel tlem thung. 

Table mawngphaha awm Hearts hian chawhrualin match khata point 0.77 nei ang an ni a, average point-ah pawh an hniam ber avangin relegate turin an chung thu rel a ni ta a ni.

Mahse, Hearts hi SPFL thutluknaah an lungawi bik lo a, court lamah an zualko dawn. Hearts chuan thuchhuah siamin, "Court-a kal hian hun a duhin sum sen hnem a ngai ang tih kan ring. Mahse, relegate kan nih avanga kan hloh tur hi a tam zawk a ni," an ti. 

Hearts neitunu Ann Budge chuan hetianga thutlukna siam a nih hma khan Covid-19 vanga club tuar bik an awm lohna turin league kalphung tihdanglam lailawk rawtin hma a lo la tawh a, hei hian division hniam lama relegate tur club dang thlengin a pui ang - hei hi Hearts beiseina pakhat a ni mek. 

Season dangah chuan Scottish Premiership aṭang hian club pakhat an rele­gate bakah 11-na hi Cham­pionship-a pahnihna nen playoff an khel ṭhin a, hei pawh hi season thar atan chuan a awm rih dawn lo a ni.