Hansi Flick leh goal 50

Bayern Munich chuan Union Berlin lakah an league goal 49 leh 50-na an khung a, manager thar Hansi Flick kaihhruaina hnuaiah league match 16 aṭangin goal 50 an khung tling der, chawhrualin match khata goal 3.1 khung anga chhut theih a ni.

Bundesliga manager awm tawh zingah Flick hi goal 50 khung tura match mamawh tlem ber a ni. A tira beseina tlemte nena an rawih khan tunah chuan club thuneitute lawmna a siam a, league an khelh chhunzawm leh hma khan 2023 thleng daih contract a ziak fel.

Kum 55 mi Hansi Flick chuan, "Khawvel pumin Bundesliga a en dawn tih kan hria, chutiang boruak karah chuan nuam ti takin kan khel thei a, a lawmawm takzet. Tuna kan kal ang hian kan chak tluang reng thei kher lo mai thei, chutiang hun a lo thlen pawha point kan hmuh zel theih nan hmasawn a ngai," a ti.

Lewandowski chungchang sawi zuiin German manager chuan, "Lewy-a'n goal 26 a khung tling der, a goal khungte hi awlsam tak angin lang mah se player dangten an tih ve theih loh a ni. Ani chu goal khung tur bik a ni a, a theihna a san bakah a chet ṭhat lai a nih avangin hnuhma ṭha a hnutchhiah zel pawh ka beisei," a ti.

•    Bayern hi inelna hrang hrang an hmachhawn hnuhnung 16-ah chak loh an nei lo.

•    Tun season bikah chuan point lia an hmahruaina hi an kal fal lai ber a ni.

•    Hansi Flick kaihhruaina hnuaiah Bayern-in league match 16 aṭangin goal 50 an khung, hemi kawngah hian Bundesliga coach awm tawh zingah record nei ṭha ber a ni.

•    Lewandowski chu Bundesliga bikah match 26 aṭanga goal 26 khung thei player pahnihna a ni chiah.

•    Pavard-a'n tun season-ah goal thum a khung tawh a, heng zinga goal hnih chu Union Berlin laka a khung a ni.