Bundesliga aṭangin kan inzir tur a ni - La Liga president
La Liga president Javier Tebas chuan Bundesliga chu inelna an ṭan theih avangin a fak a, La Liga tan pawh Germany aṭanga inzir tur a awm thu a sawi.
Tebas chuan, "Germany-in hna ṭha tak an thawk a, ka chhuang hle. Entawn tur an hnutchhiah a, Bundesliga president pawh an hlawhtlinnaah ka lawmpui tih ka hrilh," tiin Bundesliga a fak.
La Liga chungchang sawi zuiin Tebas chuan, "Medical lamin thutlukna an siam a ṭul dawn. A hun tur kan la hre thei lo a, kei chuan inelna ṭan thuai ka duh a ni," tiin an kuta a awm loh thu a sawi.
Nimin aṭang khan group angin team training an nei ṭan dawn a, hemi hma hian mimal angin training neih a ni. Training dan tharah chuan player 10 chin hmun khatah an training thei tawh a, player leh staff-te pawh training camp-a awm kher loin an in aṭangin an kal thei ang.