Hnehna nen Bayern Munich an inlar

Bayern Munich chuan an thiam an la theihnghilh lo. German champion hian hripui Covid-19 vanga an chawlh hnu, match an neih leh hmasak berah Union Berlin chu 2-0 a luhchhuahin table chung berah an dinhmun an sawhnghet.

Pathianni zan inkhelah Bayern tan Robert Lewandowski leh Benjamin Pavard ten goal an khung. Bavarians hian league match 26 an khelh tawhah point 58 an nei a, pahnihna Borussia Dortmund lakah point liin an fal; champion tum pahnih hi May 26, Thawhlehni zanah an intawng ang.

Inkhel dangah Cologne leh Mainz 05 te 2-2 in an inhnehtawk, inkharkhip hnu league round hmasa ber khar nan nizan khan Werder Bremen leh Bayer Leverkusen an inhmachhawn a, result kan hre hman lo.

German Football Association (DFB) inkaihhruaina danah khelmual chhunga entu awm loin khelh tur a ni a, tun ṭumah pawh hian Stadion An der Alten Forsterei-ah mipui an awm lo; substitute player inkar hlat taka an ṭhut bakah media mi tlemte bak hmuh tur an awm lo.

Bayern lamin inkhel thunun mah se goal nei turin an nghah rei a ngai, a tir lamah Thomas Muller-a goal khung chu offside vanga pawmsak a ni lo. Chawlhlawk hma deuhin Leon Goretzka hlawh chhuah penalty chu Lewandowski-a'n goal hmahruai khung nan a hmang.

Goal hnihna pawh second half tawp dawna lut a ni a, defender Pavard chuan Joshua Kimmich-a corner pet chu a tauh lut. Goal lawm tura inkuah leh kal khawm phal loh ni mah se France international hian goal a khung hnuah a lawm nan David Alaba a kuah.

Bayern Munich captain Manuel Neuer chuan, "Inkhel thunun chungin point thum kan hlawh chhuak thei kha a lawmawm a, kan khelh ṭhat ber ṭum a ni lo chuanga point hmuh kha a hlu. Entu awm loa inkhelh chu hamrik hmasa leh a hnuhnung ber inkar a rei duh ngei mai," a ti.

German international Neuer hian Bundesliga bikah club hrang hrang 35 a hmachhawn tawh lakah clean sheet a nei vek. Tunah hian season thar tawp ruala a contract tawp mai tur chu pawhsei tumin club nen indawrna an nei mek.

A vawi khat nana Bundesliga kheltu Union Berlin tan Bayern lakah tih theih a awm lo, coach Urs Fischer chu a puzawn a thih vangin a team a kaihruai thei lo a, nidanga an innghahna ni ṭhin fans an awm loh bawk avangin an mualah point an hlawh chhuak lo.