Hei le! Premier League a lo kir leh ta; Ennawm ropui chhawp tur City & Liverpool

International break vangin football fans tam tak lung a leng a, European top five league boruak 'hot' tak karah international football an hlimpui thei meuh lo.

International break a zo a, football fan-te duhthusam a thleng nghal dawn - vawiin tlai dar 5:00 hian Premier League champion tum Manchester City-in Liverpool an hmachhawn dawn a, Reds hi season thara Champions League khelh tum an ni thung.

Team pahnih hi, "Thih leh dam kara leng," tih pawhin sawi ila, thu uar kan ni kher lo ang. A chhan maw? City tan league champion ni turin tlawm a thiang tawh lo a, Liverpool tan a sang pali zinga season khar turin point hloh a pawi tawh dawn.

Premier League table chung berah Arsenal-in hma an hruai mek a, pahnihna City hian point riatin an phak lo mek a, match khatin an khel tlem thung. Liverpool-in palina Tottenham Hotspur an phak lohna chu point sarih a ni a, Spurs aiin match hnihin an khel tlem thung - City leh Reds inkhelh hnuhnung 34-ah goal luh lohna inkhel vawi khat chiah a awm a, zaninah goal a luh leh ngei a rinawm.

A 'hot' dawn

Tun hmaa English club inhal sawi a nih chuan Manchester United leh Liverpool boruak sawi lan ṭhin a ni a, United leh Arsenal boruak te pawh lung tileng an chang a, Jose Mourinho vanglaia Chelsea khan 'Big Four' a an elpui apiang chu boruak an neihpui viau zel bawk.

City-in 'thawnthu' sawi tur an neih tam loh avangin team ṭha ni reng chungin an boruak a 'hot' tawk lo ṭhin a, mahse, Pep Guardiola lo lan hnua an boruak danglam tawhzia chu a hmutute kan ni a, Reds-in Jurgen Klopp an lo neih ve kher bawk avangin team pahnih inkarah thil awm ngai lo kha a awm chho ṭan.

Pep leh Klopp awm hnua City leh Liverpool hi English football-a inel ber tia sawi ngam an ni a, City-in tualchhung football-a an hlawhtlinna hmangin Reds an chhuk en a, Liverpool-in European nomawi nen City chu an pheikhawk hrui phelh tlakah pawh an ngai lo thung.

October thlaa Liverpool-in 1-0 a City an lo hneh khan mawi lo taka fans au chungchang te, pawisa thira invawm leh club bungrua tihchhiat chungchangah club pahnihin an lawm lohna thuneitute hnenah an thlen ve ve a, League Cup fourth round-a City-in 3-2 a Reds an hneh ṭum lahin thil duhawm lo thleng a awm bawk - a tawi zawngin, vawiin tlai inkhel boruak hi a sosang dawn tih ringhlel suh.

Thih leh dam

Season ṭantir khan football expert tam zawkin City leh Liverpool an inum leh tur thu an sawi a, kum thar a thlen meuh erawh chuan thawnthu chu her danglam a ni ta - Arsenal an lo lang nawlh a, City elpui chu Liverpool ni loin, Gunners an ni.

Mahse, team pahnih hian an dam khawchhuahna tura an beih a ngaih ve ve miau avangin inhlahkhem thei an awm lo a, an nunna turin an bei dawn - tun hi induhsak hun a ni lo a, hliam neihsaa chi phul hun lai tak a ni zawk!

Hei hi City-in an hrechiang a, Liverpool fan-te tana ticket an pek ṭhin chu 20% in an tihniam a, ticket 3,000 an pek ṭhin chu 2,400-ah an tihniam a, fans 600-in khualmualah Liverpool fans an tlem sawt dawn tihna a ni.

City hian Liverpool nen an inkhelha boruak awm ṭhin avanga he thutlukna hi siam an ni a, Greater Manchester Police rawn chungin thutlukna hi an siam. Reds erawh Premier League hnenah an zualko a, he thu buatsaih a nih lai hian an chanchin zel hriat zui a ni lo.

A tawp khawk

Liverpool dinhmun a khirh a, hemi hrechiangtu chu coach Jurgen Klopp a ni. Reds hian City zawhah Chelsea chu Thawhlehni zan hian an lenchilh ang a, Pathianni zanah Arsenal an mikhual zui ang.

Klopp chuan, "International break a zo ang a, football tak takin min lo hmuak dawn. City, Chelsea leh Arsenal-in min lo hmuak ang a, hei hian kan hma hun tur thui takin a hril ang," tiin a lo sawi tawh a, vawiin tlai aṭangin bul an ṭan dawn - Reds hian tun season-a top five team an tum tawhah vawi hnih tlawm neiin, vawi nga an chak thung.

German coach chuan, "Kum tinin Champions League khelh hi chu kan duh a ni," a ti bawk. Mahse, Reds dinhmun a khirh tawh - table-ah parukna an ni mek a, pasarihna Brighton & Hove Albion nen an point hmuh zat inang mah se match khatin an khel tam a, khelh zat inangah pangana Newcastle United chu point ngain an phak lo bawk.

Mahse, hun harsa aṭanga tal chhuak turin team leh coach thlang dawn ila, Klopp leh Liverpool hi tam takin an thlang ang - 2020-21 season-ah khan, Liverpool hian league match hnuhnung point 30 hmuh theih aṭangin 26 an lo hlawh chhuak tawh a, hun harsaa talchhuah dan an hria.

Luis Diaz a dam tawh

Liverpool-in City hmachhawn hmain chanchin lawmawm an nei a, October thlaa a khup hliam vanga rei tak a inlan loh hnuah Luis Diaz chuan Reds training a zawm leh tawh a, Colombian forward hi Jurgen Klopp-a'n a duh chuan a chhawr thei leh tawh dawn niin a lang.

Mahse, Klopp-a'n hliam damkawr Diaz rin nghal ai chuan Mohamed Salah, Cody Gakpo leh Darwin Nunez te chu tlarhmaah a inkawptir a rinawm a, Roberto Firmino leh Diogo Jota te bench lamah an la dah thei cheu dawn bawk - tlarhmaah buaina a awm lo.

Salah hian City a hmachhawnin goal 10 a khung tawh a, tun season-a FA Community Shield, Premier League leh Carabao Cup an inkhelhnaah goal a khung vek tawh - vawiin tlaiah goal khung a tum leh dawn a, City tlarhnung tan ven bik a sual lo ang.

Hetihrual hian season tluana Liverpool buaina midfield bawk hi City lakah buaina a ni dawn. Tun season-a rin phak baka rawn khel ṭha Stefan Bajcetic chu malpui hliam vangin season tawp thleng a inlan thei tawh dawn lo a, Thiago Alcantara chu a khel bawr hliam vangin a inlan thei dawn lo bawk.

Player ṭha pahnih tel loin Reds hian midfield-ah Jordan Henderson, Fabinho leh James Milner an inkawptirin a rinawm a, team ṭha City meuh hneh nan a tawk zo ang em, tih chu zaninah kan hria ang.

Tun season-a Liverpool player zinga 'form' awmchhuna chhal ngam Alisson Becker hi si ban nghak turin a la rintlak reng a, Trent-Alexander Arnold, Ibrahima Konate, Virgil van Dijk leh Andrew Robertson ten tlarhnung an veng bawk tura ngaih a ni.

Haaland a inhliam

Manchester City ṭantuten Liverpool an hmachhawn hmain chanchin lawmawm lo an nei a, chu chu Erling Haaland inhliam thu a ni - Norwegian striker hian a ṭhalah hliam a neih avangin Euro 2024 qualifier pawh ram tan a khel thei lo a, a chawl hahdam.

Haaland hi international break chhung zawng a chawl hahdam a, hriat theih chinah Ningani thleng khan club training a la zawm lo. Tun season-a goal 42 zet khung tawh striker hian Liverpool a hmachhawn thei lo a nih ngat chuan City tan chânna a ni ang a, Liverpool an lawm thung ang.

Hetihlai hian City midfielder Phil Foden chu a ril phir zai a nih avangin a inlan thei dawn lo bawk a, Manchester khaw club hian an ṭhat dan berin Liverpool an hmachhawn thei dawn lo - City squad hi a chhah ṭha tawk, tih erawh hriat tel a ṭha.

Kum 22 mi Haaland hi a inlan thei lo a nih chuan world champion Argentina tana player pawimawh ni phak Julian Alvarez chu a hmun ruak luah turin a la awm cheu a, Pep-a'n tlarhmaah Bernardo Silva leh Jack Grealish te nen a inkawptir rin a ni.

Midfield-ah Rodri, Kevin de Bruyne leh İlkay Gündoğan te an inkawp theih chhung chuan Reds tan a harsa dawn tih a chiang a, Gündoğan hian bul a ṭan loh chuan Bernardo chu tawlh hnungin tlarhmaah Riyad Mahrez a awm thei bawk.

Ederson chu si ban nghak tura ngaih a ni a, Kyle Walker, John Stones, Ruben Dias leh Nathan Ake ten tlarhnungah bul an ṭan thei bawk ang.